New Delhi, Lber:
Ka Gurugram Metropolitan Development Authority (GMDA) kum shi bynta ban weng ïa ki jingeh ba ïakynduh na ki jingdheng kali ha kiba bun ki lad, ka la wanrah noh da ki rukom pyntreikam kiba thymmai khnang ba yn lah ban weng noh shi syndon ïa ki jingeh ba ki paidbah ki ïakynduh.
Kane ka jingpyntreikam ha kaba ïadei bad kane ka long halor ka jingpynkiew ïa ka jingsiew na ka bynta ka rukom pynïeng kali beaiñ jong ki briew ha ka nongbah, bad la pynkiew arshah na ka bynta ki kali kit mar ki baheh bad ki kali barit kata ki kali saw shaka halor ka jingsiew, la ong ki heh ka kynhun kiba dei khmih halor kane ka bynta, ha kaba la bynrap shuh shuh da kaba ong ba ka jingpyntreikam ha kaba ïadei bad ka jingsiew kaba thymmai ka la sdang naduh ki khyndiat bnaai ba la lah.
Ha kaba ïadei bad ka jingpynkylla halor ka jingdaiñ kuna ïa ki kali kiba shu pynïeng beaiñ, la ong ba ki kali saw shaka kiba pdeng, kynthup ki kali kit mar kin sa shah daiñ kuna da T. 2,000, katba T. 1,000 na ka bynta ki kali kiba rit bad T. 500 na ka bynta ki kali ar shaka.
Kine ki jingsiew la pynthymmai hadien san snem, la ong ki heh jong ka GMDA.
Hashwa ïa ka jingsiew la buh T. 1,000 na ka bynta ki kali heh bad kiba pdeng, kynthup ki kali kit mar, T. 500 na ka bynta ki kali rit kiba saw shaka bad T. 200 na ka bynta ki kali kiba ar shaka, la ong shuh shuh ki heh ka GMDA.
Naba ïa ka jingsiew la oh da ka GMDA, ka jingdaiñ kuna na ka bynta ki kali kiba la pynïeng beaiñ ki la shah oh ha ka dor ba la buh da ki pulit pynïaid kali jong ka Gurugram.
Ka jingpynïeng khlem akor ïa ki kali ha ki surok, hajan ki ïew bad kiwei pat ki jaka pule ka la wanrah ïa ki jingeh kiba bun ha kylleng ka nongbah, nalor kane ki jingeh ki mih ruh naba ki nongshong shnong ki la ïaleh ban pynïeng ïa ki kali jong ki ha ki surok ba don hajan ki ïing jong ki.
Hadien ba la khmih bniah na ka jingpyntreikam ba la wanrah da ka GMDA, la shem ba ka la ïarap shisha ha ki rukom pynïeng ïa ki kali bad kane ka jingpyntreikam kan sa ïai bteng bad ban pynneh ïa ka.
Ka GMDA ka la bthah ïa ki nongñiah kali ba ki la dei ban bud ryntih ïa ki kyndon ba la buh khnang ba kan pynsuk ïa ki ruh kumjuh.
