Shillong, Lber 17
Ki kyndon pyrkhing ilekshon lane Model Code of Conduct (MCC) ki la treikam pura ha baroh kawei ka ri hadien ba ka Election Commission of India (ECI) ka la pynbna ïa ki tarik ban thep ‘vote’ haduh hynñiew wat ha baroh kawei ka ri na ka bynta ka ilekshon sha ka Ïingdorbar Lok Sabha.
Ka jingthep ‘vote’ kan sdang ha ka 19 tarik Ïaïong haduh ka 1 tarik Jylliew bad ka jingñiew ‘vote’ kan long ha ka 4 tarik Jylliew.
Ka ECI lyngba u Chief Election Commissioner (CEC) ka la bthah ïa ki seng saiñ pyrthei bad ki kyrtong kiba ïakhun ha ka ilekshon Lok Sabha ban bud ryntih ïa ki kyndon pynïaid ilekshon kiba la pynjari ha baroh kawei ka ri.
Ka ECI ka la pynmih ïa ki kyndon kiba ym dei ban leh bad ki kyndon kiba shah ban leh na ka bynta ki seng saiñ hima bad ki kyrtong na ka bynta ban pynlong ïa ka ilekshon kaba laitluid bad kaba khuid.
Ka ECI ka la mana ruh ïa ki Sorkar Jylla bad Sorkar Pdeng ba ym dei ban pynbna kino-kino ki jingshim rai.
Ki kyndon pyrkhing ilekshon ki kynthup ruh naduh ki rukom kren ha ka por ba ïalap ilekshon, ha ka sngi thep ‘vote’ bad kiwei kiwei.
Ka jingpyntreikam ïa ki kyndon pyrkhing ilekshon kan neh baroh 2 bnai shiteng tad haduh ban da dep lut ka ilekshon.
Nalor kiba bun ki jingpyrkhing, ka ECI ka la mana lypa ruh ban nym dei ban rah pisa palat `50,000 namar kan don ka jingpeitngor bad talasi ha kylleng ki jaka.
