Tokyo, Lber:
Katkum ki khubor la ong ba uwei u ‘Rocket’ ba la shna da kawei ka kompeni na Japan u la bthei noh hadien ba la pynher ha ka Sngi Balang. Na ka liang ki lad pathai khubor ka Japan ki la pyni bad pynbna ruh ia ka jingpulom jong katei ka jingpynher ‘rocket’ jong katei ka ri ha katei ka sngi.
Namar la ong ba katei ka kompeni na ka nongbah Tokyo jong ka Japan, ka thmu ban ioh long ka kompeni kaba nyngkong eh ban lah leit buh kor satellite ha ka lynti iaid ki met bneng sha haw-haw, hynrei la ong ba katei ka jingthmu jong katei ka kompeni ka la pulom noh hadien ba utei u kor satellite u la bthei noh ha katei ka sngi.
Utei u rocket, la ong ba u don ia ka jingheh kumba 18 meter lane 60 phut. La pynher ia u na ka jaka pynher rocket na Wakayama, kaba don sha ka phang Sepngi jong ka ri Japan.
La ong ba tang hadien kumba katto katne sekon ba la pynher ia utei u rocket na katei ka jaka, utei u rocket u la kem ding bad bthei noh syndon ha ryngkat ka tdem kaba ïong bad rben kaba la pynlynguh ia katei ka jaka.
Hadien kata la iohi ruh ia ki lyngkhot-lyng-khai kiba la hap na utei u rocket ba la julor bad kiba la phriang sha kylleng ki bynta jong katei ka thaiñ Rilum jong ka Japan.
Kumta, la ong ba katei ka jingbthei bad jingpulom noh jong ka jingtrei shitom bad jingpyrshang jong katei ka kompeni ha kane ka sien, ka la wanrah jingduh jingkyrmen noh ia katei kompeni pynher rocket jong ka Japan kiba kwah ban pynioh nam bad burom ia ka Japan lyngba ki kam bad jinglah jong ki.
