Shillong, Lber 17
Ka Royal Cricket Club ka la ïoh jingjop ha ka lympung ïalehkai Super Division Shillong Cricket League ba la pynïaid da ka Shillong Cricket Association kaba la long ha ka Sngi U Blei ha madan Polo.
Haba phai sha ka jingïalehkai, ka Royal Cricket Club kaba la jop ïa kynting pisa ka la kam trai ban kawang bol nyngkong. Ka Sputnik CC kaba la tied nyngkong ka la ïoh tang 123 run na ki 33.2 over bad hap lut baroh ki wiket.
Ki nongtied ka Sput-nik kiba la ïoh bun run ha kane ka jingïalehkai ki long u Mark Ingty uba la tied 42 run na ki 63 tylli ki bol bad u Mridul Das u la tied 21 run na ki 28 tylli ki bol katba u Raj Biswa ka Royal CC uba la kawang 5 over u la shim 3 wiket bad ai 17 run bad u Abhishek Kumar ruh na ki 5.2 over kiba u la kawang, u la shim 3 wiket bad ai 24 run.
Haba beh ïa katei ka thong kaba rit, ki nongtied ka Royal ki la lah ban pyndep tang ha ka over kaba 26.5 da kaba tied 124 bad ban hap 6 tylli ki wiket. U Raj Biswa marwei u la tied 45 run tang na ki 30 tylli ki bol bad u Khalid Ahmed u la tied 24 run na ki 31 tylli ki bol, katba u Aryan Borah uba la kawang 8 over u la ai 33 run bad shim 4 wiket, u Aditiya Singhania pat u la shim 2 wiket na ki 8 over bad ai 25 run.
Kumta kane ka la pynlong ïa ka Royal CC ba kan jop ïa kane ka jingïalehkai da 4 wiket bad ha kane ka sngi ïa ka nam ‘Player of the Match’ la ïoh da u Raj Biswa uba la tied 45 run bad ruh ban khur 3 wiket.
