Shillong, Lber 17
Ka Indian Forest Service Association (IFSA) ka la thoh sha u Chief Secretary ka Jylla, Bah D.P. Wahlang, ban dawa da ka jingtohkit CBI halor ka jingkhlad noh u ophisar IFS ka Jylla uba bat ruh kum u Chief Conservator ka tnad khlaw ka Jylla, u N. Luikham.
Kum ban shu kdew hangne, la kynnoh ba utei u heh ophisar u la khlad da kaba dkhat jubor ïa la ka jingim ha ïingsah jong u ha ka 13 tarik Lber, 2024.
U Secretary General ka IFSA, Suneesh Buxy, ha ka shithi ba la phah sha u Chief Secretary, u la kdew ba kawei na ki bynta halor ka jingdkhat noh jong utei u heh ophisar ïa la ka jong ka jingim ka dei namar ka jingshah kynnoh ba u la thombor ïa kawei ka ophisar ka Sorkar Meghalaya.
“La ïoh jingtip ruh ba u N. Luikham u la don hapdeng ka jingktah ka jingmut-jingpyrkhat bad jingshitom namar kine ki jingkynnoh ba lamler ba la kyrshan da katto-katne ki ‘riewdon bor kiba don bynta ha ki kam tih/khaïi marpoh khyndew hapoh ka Jylla. La ïoh jingtip ruh ba ym shym la lap ïa kano-kano pyrshah ïa utei u ophisar ha kaba ïadei bad katei ka jingshah kynnoh,” la ong u Buxy ha ka shithi, ïa kaba la phah kopi lang sha u Myntri ka tnad mariang ka Sorkar Pdeng, u Bhupender Yadav.
U Buxy u la ong ba ki jinglong-jingman halor ka jingkhlad jong utei u heh ophisar ka la pynmih ïa kiba bun ki jingkylli bad la kyntu ïa u Chief Secretary ban aiti noh ïa katei ka kam sha ka CBI na ka bynta ka jingtohkit kaba bniah bad ka bym shah liang, bad ka jingpynshitom ba tyngeh halor ka jingpynshlur ïa kum kitei ki kam ne jingbymkitkhia, ban khang lad ïa kiba kum kitei ki jingjia ban ïai jia.
Ka IFSA ka la ong ba u Luikham u dei u ophisar uba tbit bha ha ka rukom treikam ha ryngkat ka jinghok bad ka jinglong ba bha.
“Ka jingkhlad noh bym pat dei por jong u ka ktah shikatdei haba phai sha ka jingïakhun na ka bynta ban pynneh-pynsah ïa ki jingdon-jingem mariang,” la ong ka shithi.
Utei u ophisar IFS u dei jong u snem 2003 bad u la don kumba 50 snem ka rta.
Na ka liang u SP ka East Khasi Hills, kham hashuwa, haba kynthoh halor ka jingkhlad jong utei u heh ophisar, u la ong ba ki pulit kim shym la lap sabut eiei la ka don ne em ka jingleh bym hok (foul play) halor ka jingkhlad noh jong u.
“Haduh mynta ngim shym la lap ïa kano-kano ka jingleh be-aiñ (foul play), ym don jingsuba ne jingujor. Katkum ka kaiphod ‘Post-Mortem’, ka dei ka jingjia ha kaba la dkhat noh la ka jingim,” u la ong.
