Shillong, Lber 17
Ka Mohammedan Sports Club bad ka Sreenidi Deccan ki la ïoh jingjop ha ka lympung I-League, katba ka jingïakhun hapdeng ka Real Kashmir pyrshah ïa ka Delhi Sports Club ka la kut noh ha ka jingïakhaid.
Haba phai sha kine ki jingïalehkai kiba la long ha ka Sngi U Blei, kata ha ka jingïalehkai ba nyngkong, ka Mohammedan SC ka la lah ban pynliem noh ïa ka NEROCA da 2-0 kol bad ïa kine baroh ar tylli ki kol la thep da u Eddie Hernandez ha ka minit ba 42 bad 54.
Lyngba kane ka jingjop, ka Mohammedan SC ka la kamai 47 point na ki 20 tylli ki jingïalehkai bad ban don ha ka kyrdan ba nyngkong ha ka miej ïakheiñ point bad ban tam da 8 point ïa ka Sreenidi Deccan kaba don ha ka kyrdan kaba ar.
Ha kawei pat ka jingïalehkai, ka Sreenidi Deccan ka la lah ban pynliem noh ïa ka Gokulam Kerala da 2-1 kol bad ïa ki kol jong ka Sreenidi la thep da u William Alves de Oliveira ha ka minit ba 47 bad 71 katba ïa ka shi kol jong ka Gokulam la thep da u Nikola Stojano-vic ha ka minit ba 44.
Lyngba kane ka jing-jop, ka Sreenidi Deccan ka la kamai 39 point na ki 19 tylli ki jingïalehkai katba ka Gokulam Kerala pat kaba dang ïoh 36 point na ki 21 tylli ki jingïalehkai ka la hiar sha ka kyrdan kaba 4 ha ka miej ïakheiñ point.
Ka jingïalehkai hapdeng ka Real Kashmir bad Delhi pat ka la kut noh ha ka jingïakhaid da mar shi kol, ha kaba ïa ka kol ka Delhi la thep da u Gurtej Singh ha ka minit ba 52 katba ka Kashmir pat ka la ïoh ïa ka shi kol, ïa kaba la thep bakla hi da u rangïalehkai ka Delhi u Naveen Kumar sha la ka jong ka kol ha ka minit kaba 82.
Lyngba kane ka jingïakhaid, ka Real Kashmir ka la ïoh 36 point na ki 20 tylli ki jingïalehkai bad kiew sha ka kyrdan kaba lai, katba ka Delhi pat ka dang ïoh 23 point na ki 20 tylli ki jingïalehkai bad dang neh ha ka kyrdan kaba 9.
Lashai ka 18 tarik pat ka jingïalehkai ha kane ka lympung kan long hapdeng ka Inter Kashi pyrshah ïa ka Aizawl Football Club ha ka por 7 baje janmiet.
