Shillong, Lber 17
Ka Real Madrid bad ka Bayern Munich ki la ïoh jingjop ha ka lympung ïalehkai bapher bapher jong dewbah Europe kaba la long ha ka Sngi Saitjaiñ.
Haba phai sha ka jingïalehkai ha ka lympung La Liga ha Spain, ka Real Madrid ka la lah ban pynliem noh ïa ka Osasuna da 4-2 kol. Kane ka jingjop ka la wan ruh lyngba ka jinglah ban thep ar kol da u Vinicius Junior.
Haba phai sha ka jingïalehkai, dei ka Real Madrid kaba la ïoh ban khyrwit ka kol ba nyngkong tang ha ka minit kaba 4 lyngba u Vinicius Junior hynrei tang ha ka minit ba 7, ka Osasuna ka la ïoh ban pynphai ïa kane ka shi kol lyngba u Ante Budimir. Kumta katba ka jingïalehkai ka dang ïaid, ha ka minit kaba 18, ka Real Madrid ka la ïoh ban tam da 2-1 kol lyngba ka kol ba la thep da u Dani Carvajal. Kane kol ka la neh tad haduh ba kut jong ka kylla step.
Haba bteng ïa ka kylla miet, tang hapdeng 4 minit ka Real Madrid ka la ïoh ban thep sa ar tylli ki kol, kata ha ka minit kaba 61 lyngba u Brahim Diaz bad ha ka minit kaba 64 da u Vinicius Junior uba la thep ïa ka kol kaba ar jong u bad kaba saw jong ka Real Madrid, hynrei shwa ban wai ka jingïalehkai, ka Osasuna ka la ïoh ban pynphai sa tang shi kol kata lyngba u Iker Munoz.
Lyngba kane ka jingjop, ka Real Madrid ka la kamai 72 point na ki 29 tylli ki jingïalehkai bad ban tam da 10 point ïa ka Girona kaba don ha ka kyrdan kaba ar ha ka miej ïakheiñ point ka lympung La Liga, katba ka Osasuna kaba dang ïoh 36 point na ki 29 tylli ki jingïalehkai ka dang neh ha ka kyrdan kaba 11.
Kumba ka long mynta, ka Real Madrid ka la don ha ka lynti ban khur ïa ka nam lahduh kaba jong ka La Liga hapoh ka jingïalam u Carlo Ancelotti, uba la khur ruh ïa ka jingjop kaba 200 ha baroh ki lympung na ka bynta kane ka club.
Ha kawei pat ka jingïalehkai jong ka lympung Bundesliga ha Germany, ka Bayern Munich ka la lah ban pynliem noh ïa ka Darmstadt da 5-2 kol bad u Harry Kane ruh u la thaw ïa ka rikod kaba thymmai ka jong u, ban khyrwit 31 tylli ki kol tang ha kawei ka aiom.
Kane ka jingjop ka la pynlong ruh ïa ka Bayern Munich ba mynta kan duna sa tang da 7 point hadien ka Bayern Leverkusen kaba don ha ka kyrdan kaba nyngkong ha ka miej ïakheiñ point ka Bundesliga.
Ka Bayern Munich ka la kamai 60 point na ki 26 tylli ki jingïalehkai bad nang pynskhem ïa ka kyrdan kaba ar, katba ka Leverkusen kaba don ha ka kyrdan ba nyngkong, ka la kamai 67 point na ki 25 tylli ki jingïalehkai bad ka lah ban tam da 10 point lada kan khur jingjop ha ka jingïalehkai ban long.
