Shillong, Lber 17
U nongaiktien ka Voice of the People Party (VPP), Bah Batskhem Myrboh, u la ong ba ka jingkhih ki samla ka la ïarap shisha ïa ka seng lyngba ka rynsan social media naduh ka ilekshon MLA bad mynta ha ka ilekshon MP Lok Sabha.
Haba ïakren hadien ba ka Election Commission of India ka la pynbna ha ka 19 tarik Ïaïong 2024 ban thep ‘vote’ ha Meghalaya, u Bah Batskhem u la ong ba ka jingdon ka ‘social media’ ka la ïarap shisha ïa ka VPP ban pynrung ïa ki nongrim jong ka seng sha ki samla bad wat ïa kiba la noh ka rta namar shisien ba la peit khubor uwei baroh ki dkhot jong ka ïing ki la peit lang.
U la ong ba baroh u briew mynta u la bat la ka jong ka ‘mobile phone’ bad ka jingpynshai jong ki nongïalam ka VPP ka la rung lut sha ki jaka sor bad sha ki nongkyndong ruh. Dei namar kata ka daw ba kane ka ilekshon MP mynta ka beh bha ka lyer ha ka shap jong u Prah.
Nalor nangta, u la pynpaw ba da ka jingkhih ki paidbah ha kylleng ka Bri U Hynñiewtrep ka la pynlong ïa ki nongïalam ka NPP bad UDP ba kin pynshai ïa ka nongrim lajong, ki bunkam ban kynthoh ïa ki nongïalam ka VPP.
Ha kawei ka liang, une nongaiktien ka VPP u la pynpaw ïa ka jingsngewsih namar kine ar tylli ki seng ki kynthoh beit shimet ïa ki nongïalam ka VPP.
U Bah Batskhem u la ïathuh ba wat la ka VPP kam shym la pynïeng kyrtong ha ka ilekshon MLA ha katto-katne ki konstitwensi hynrei ka jingkhih ki paidbah wat ha kito ki bym don nongkitkam ruh.
Ha kajuh ka por u la pyntip ba kito shnong kaba u kyrtong ka VPP u Dr. Ricky Syngkon uba la dep leit ha kine ki sngi un nym lah shuh ban leit biang namar u hap ban leit sha kiwei pat ki shnong ki bym pat leit.
U la ong ba ki nongkitkam ka VPP kin nym shongthait shuh ban leit pynshai ïa ki nongrim jong ka seng nangne shakhmat haba la dep pynbna ïa ka tarik thep ”vote”.
