Jowai, Lber 17
U kyrtong ka Regional Democratic Alliance (RDA), u Bah Robertjune Kharjahrin u la ong ba ka ilekshon ban jied nongmihkhmat sha ka Lok Sabha ka long kaba donkam namar ka Parliament kan rai la yn pynneh ne pyndam ïa ka Khyrnit ba 6.
“Ha Parliament yn rai hato ka hok ban bud laitluid kano-kano ka niam kan dang bteng ne kumno,” la ong u Bah Robertjune ha ka jingïalang paidbah ba la long ha Ïew Mowkaïaw ha ka Sngi Saitjaiñ. U la ong ruh ba ha Parliament la ju wanrah ki kpait saiñ kam (policy) kiba bun jait bad kiba ktah ïa ka ïap ka im ki briew, kumta ka long kaba donkam ban leit thep ‘vote’ ha kane ilekshon sha ka Lok Sabha.
Haba bteng halor ka jingdonkam jong ka Khyrnit ba 6, u Bah Robertjune u la ong lyngba ba ka Khyrnit ba 6 la thaw ïa ka District Council bad ka long kaba donkam ban pynneh-pynsah ïa ka District Council khnang ban ïada ïa ka riti-dustur bad ka kolshor jong ka jaidbynriew rit paid.
Haba phai sha ka jingmih jong ka Regional Democratic Alliance, u Bah Robertjune u la pynshai ba ka RDA ka ïeng ban ïada ïa ka jaidbynriew bad ïa ka Jylla na ka jingrung kyrthep ki bar Jylla shapoh ka Jylla. Une President barim jong ka HYC u la maham ba Ri Bangladesh ka don ka jingbun paid kaba 16 klur bad na ka daw jong ka jingkiew ka jingkhluit ka mei mariang ne ‘global warming’ shiteng na ka Bangladesh kan sa ngam um.
U la ong ba kitei ki nong Bangladesh kin sa phet wir sha ka thaiñ Lam Mihngi bad tang ka Jylla Assam bad Meghalaya ka bym don Inner Line Permit (ILP) bad shu mutdur lada 10 lak ngut ki nong Bangladesh kin rung sha Meghalaya kaei ban jia ïa ka Jylla.
Haba pynshai halor ki mat ïakhun ilekshon sha ka Lok Sabha, u Bah Robertjune u la ong yn ïakhun ban wanrah ïa ka ILP ha ka Jylla, ban ïasaid ha Parliament khnang ban ithuh noh ïa ka ktien Khasi ha ka Khyrnit ba 8 jong ka Riti Synshar ka Ri India bad ban pynbor ïa ka Sorkar India ban pynbeit noh ïa ka jingïakajia khappud hapdeng Assam bad Meghalaya. U la ong shuh shuh ba yn ïakhun ban ïoh ïa ka jingithuh ïa ka jingngeit Niamtre bad Seng Khasi kum ka ‘Minority Religious Status’. U la bynrap ba un ïakhun ban wanrah noh ïa ka ‘Cadre’ kaba la jong na bynta ki IAS bad IPS namar mynta ki dang don hapoh ka ‘Cadre’ Assam-Meghalaya. U Bah Robertjune u la kyntu ïa ki paidbah ba kim dei ban jied nongmihkhmat ha jingsngew niam ne jingsngew thaiñ.
