Guwahati, Lber:
Ka Sorkar Odisha hadien ka jingkhmih bniah ha kiba bun ki liang, ka la pynpaw ba ka donkam ïa ki jingïarap bad ki jingkyrshan jong ka sorkar kmie ha kaba ïadei bad ka jingkyntiew ha kiba bun ki liang khamtam ha ki thaiñ ba kham ïakynduh jingeh na ki kam pyntriem jong ki lehnoh Maoist.
Ki bor sorkar ki la ïadon bynta ban khmih ïa ki bynta ba jur ki kam thombor jong ki lehnoh Maoist jong ka Swabhiman Anchal kaba don ha Malkangiri distrik, ka la kyrpad ïa ka sorkar kmie ba ka dei ban pyllait ïa ka pisa na ka bynta ban shna ïa ki surok ha ki jaka ba jur ki kam pyntriem jong ki lehnoh.
Ka Swabhiman Anchal ka don kumba 151 tylli ki shnong ha 9 tylli ki Gram Panchayat ïa kiba dang sah kum ki jaka ba dei ban shim khia na ka bynta ki pulit ka jylla naba ki heh nongïalam jong ka kynhun lehnoh jong ka Andhra-Odisha Border Special Zonal Committee ki dang don bad pyntreikam ïa ki kam pyntriem ha katei ka jaka. Kitei ki thaiñ ki dang sah teng na ka bynta ban wanrah ïa ki kam pynroi la kumba 40 snem ha kaba katei ka thaiñ kam shym la shah khmih ha ka sorkar tad haduh u snem ba la lah, ha kaba la thmu ban shna da ka jingkieng bad ki surok na ka bynta ka jingthmu ban pynduna ïa ki kam pyntriem jong ki lehnoh.
“Ki kynrum-kynram ha Malkangiri ki dang ïai bteng bad ki lehnoh Maoist kin sa pyrshang katba lah ban pyni ïa ka jinglah jong ki ban leh ïa ki kam pyntriem lada ki ïohlad. Hadien slem bah ngi la lah ban pynlong ïa ka Lok Sabha bad Assembly Polls ha Malkangiri khlem kino kino ki jingjia iakynad ne ki jingshah thombor. Mynta ngi la sdang ban pynstet ha ka ban shna ïa ki surok ha kitei ki thaiñ ba ju jur ki kam pyntriem jong ki lehnoh,” la ong u heh pulit jong ka Odisha.
Ka sorkar jylla ka la phah ïa ka pisa ba T. 55.5 klur sha ka tnat Rural Development na ka bynta ban shna ïa ka surok ba 120 km ha katei ka jaka.
ïa katei ka surok yn sa shna hapoh ka jingtreikam jong ka Road Connectivity Project for Left Wing Extremism (RCPLWE) Programme jong ka tnat RD ha kaba ka kynthup ïa ki jaka kum ka Papermetla, Panasput, Kuntulpadar, Musruguda, Jodambo, Laxmipuram bad Kumuda ha kaba ki lehnoh Maoist ki ju shang laitluid bha.
Wat lada ki shipai ka tnat Border Security Forces ki la buh ïa ki jaka treikam jong ki bad ka India Reserve Battalion ka la ong kawei na ki jaka treikam hapoh ka thaiñ Swabhiman Anchala, ki la don tang ki jingïalehkai ïarieh hapdeng ki shipai ïada ri bad ki lehnoh naba kam ju don ka jinglah ban ïakhun pyrshah ïa kitei ki lehnoh.
Hynrei mynta la kyrmen ba da ka jingai jingkyrshan jong ka sorkar kmie yn sa lah ban pynduh pyndam ïa baroh ki kam pyntriem jong ki lehnoh ha kane ka thaiñ bad kumjuh ha ka jylla hi baroh kawei.
