Mynta ka Nongthymmai pyrshah ïa ka Rangdajied United FC ha ka SPL

Lah ban pynkynmaw ba kane kan dei ka sien kaba nyngkong eh na ka bynta jong ka Nongthymmai ban ïakhun ha kane ka kyrdan.

Shillong, Lber 17                                     

Ka lympung ïalehkai Shillong Premier League (SPL) 2023-24 ba la pynïaid da ka Shillong Sports Association (SSA) kan sdang lashai ka sngi ka 18 tarik ha First Ground (SSA Stadium) kaba ha Polo, Shillong.

Ka jingïalehkai kaba nyngkong eh jong kane ka lympung kan long hapdeng ka Nongthymmai Sports Club pyrshah ïa ka Rangdajied United Football Club ha ka por 3 baje janmiet.

Lah ban pynkynmaw ba kane kan dei ka sien kaba nyngkong eh na ka bynta jong ka Nongthymmai ban ïakhun ha kane ka kyrdan. Kumta la khmih lynti ba kane ka jingïakhun, kan long kaba itynnad bad kan pyrshang kat-lah kat-ïai ban sdang da ka jingjop ne ban ïoh rah eiei na kane ka jingïakhun.

Wat la ka Rangdajied United FC ka la dei ka club kaba la don ha kane ka kyrdan naduh ba la sdang pynban kan nym kheiñ sting satia ïa kane ka jingïalehkai bad kan khmih lynti ban sdang ïa kane ka lympung da ka jingjop.

Ha ka sngi kaba bud ka 19 tarik pat ka jingïakhun ha kane ka lympung kan long hapdeng ka Sawmer Sports Club pyrshah ïa ka Nangkiew Irat Sports Club ha ka por 3 baje janmiet ha katei hi ka madan.