Shillong, Lber 17
Ka Zublee Foundation, ha ryngkat ka jingïasnohktilang bad ka North Eastern Development Finance Corporation Limited (NEDFi), hapoh jong ka projek VARDAAN, ka la pynlong ïa ka ‘workshop’ halor ka jingsynñiang ïa ki dkhot met jong kiba la ïap ne ka ‘Deceased Organ Donation’.
Kane ka ‘workshop’ kaba la pynlong ha North Eastern Hill University (NEHU) ha ka 14 tarik mynta u bnai ka la sakhi ïa palat 180 ngut ki nongïashim bynta.
Ka ‘workshop’ – u mawmer ha ka jingïaid lynti jong ka VARDAAN, ka thmu ban pynshai kham bha haba ïadei bad ka sienjam haba phai sha ka jingsynñiang ïa ki dkhot met. Ka Priyanka Borah, CEO ka Zublee Foundation, ka la ïalam ïa katei ka ‘workshop’, ha ryngkat ka jingkyrshan ki dkhot jong ka kynhun na Guwahati, Assam.
Haba kren halor ka ‘workshop’, u (Prof.) R.L. Nongkhlaw, Dean of Students’ Welfare, NEHU, u la kren halor ka jingdonkam jong kaba kum kane ka ‘workshop’ ha ka sien kaba nyngkong. U la batai ruh halor ka jingdonkam jong ka jingsynñiang ïa ki dkhot met ha ka imlang-shalang kaba mynta, ha kawei ka liang kaba long kum ka jingpynsaphriang jingtip sha kiba bun.
U Prof. S.R. Joshi, khlieh ka tnad pule Biotechnology & Bioinformatics, u la khring ïa ki nongwan shim bynta lyngba ki jingbatai bniah jong u haba ïadei bad ka bynta ba kongsan jong ka jingsynñiang ïa ka snam bad ki dkhot met. Haba ïasam ïa ka jingïaid lynti jong u kum u nongai snam, u la ai mynsiem ïa kiba bun ha kane ka liang. Na ka liang u Prof. Joshi u la kyntu ïa ki nongshim bynta ban pynsaphriang ïa ka khubor bad shim ki lynti kiba dei ban ïaid shakhmat bad ki sienjam ha ka liang ka jingsynñiang ïa ki dkhot met.
Katei ka ‘workshop’ ka la kynthup ïa ki tnad treikam bapher-bapher kum ka tnad aiñ, ‘Biotechnology’, ‘Architecture’, ‘Information Technology’, ka rep ka riang, ‘Electronics and Communication Engineering’, ‘Chemistry’ nalor kiwei-kiwei. Kane ka jingkynthup lang ka pyntikna ïa ka jingsaphriang khubor ba salonsar kumjuh ban kyntiew ïa ka jingsngewthuh lang bad jingminot na bynta ka bha ka miat jong ka imlang-sahlang.
