Shillong, Lber 17
Ka Chelsea bad ka Manchester City ki la ïoh rung sha ka semi-final jong ka lympung FA Cup hadien ba ki la ïoh jingjop ha ka jingïakhun quarter-final.
Haba phai sha ka jingïalehkai kaba la long ha ka Sngi U Blei, ka Chelsea ka la lah ban pynliem noh ïa ka Leicester City da 4-2 kol. Wat la ka jingjop ka la i kumba ka lah shiliang hynrei ka la long shisha kaba eh na ka bynta ka Chelsea, kaba la ïoh ban knieh ka jingjop ha ki minit jong ka ‘injury time’.
Ha kane ka jingïalehkai, ka kylla step ka la dei jong ka Chelsea, ha kaba tang ha ka minit 13, ka la ïoh ïa ka kol ba nyngkong lyngba u Marc Cucurella bad ha ka minit kaba 26 pat ka la duh noh ïa ka kabu ban tam da 2 kol hadien ba u Raheem Sterling u la pynlehnohei ïa ka penalty tangba kane kam shym la neh slem bad ha shwa ban wai ka kylla step, ka Chelsea ka la ïoh ka kol ba ar ba la thep da u Raheem Sterling bad ban tam lypa da 2-0 kol.
Haba bteng ïa ka kylla miet, wat la ka Leicester ka la shah thep 2 kol hynrei ha ka minit kaba 51 ka la ïoh mynsiem lyngba ka shi kol ba la kum bakla thep hi da u rangïalehkai ka Chelsea u Axel Disasi. Nangta ha ka minit ba 62 u Stephy Mavididi u la ïoh ban khyrwit ïa ka kol kaba ar ban pynïakhaid da mar 2 kol.
Kane ka jingïalehkai la i kumba kan sa poi sha ka extra time, namar wat hadien 90 minit ym shym la don ba lah ban pynkhih jar, hynrei ki ar ngut ki rangïalehkai ba la mih bujli kata u Carney Chukwuemeka bad u Noni Madueke ki la ïoh ban khyrwit kol ha ka minit ba 90+2 bad 90+8 bad ban knieh syndon ka jingjop na ka Leicester City.
Ha kawei pat ka jingïalehkai, ka Manchester City ruh ka rung sha ka semi-final ka FA Cup hadien ba ka la lah ban pynliem noh ïa ka Newcastle United da 2-0 kol ha ka jingïalehkai ba la long ha Etihad Stadium ha ka sngi Saitjaiñ.
Lyngba kane ka jingjop, ka Manchester City hapoh ka jingïalam u Pep Guardiola ka dang don ha ka lynti ba kan rah biang ïa ki lai tylli ki nam lahduh ba heh ka dewbah Europe, kata ka Champions League, Premier League bad FA Cup.
Ka Manchester City kan dei ruh ka club ba nyngkong ha ka histori jong ka FA Cup ban rung semi-final haduh hynriew sien kynthih bad ban rung ruh ha ki hynñiew tylli ki semi-final na ki 8 sien ba u Pep Guardiola u la ïalam.
