Gaza, Lber:
Katkum ki khubor la ong ba la ioh jingtip ba ki heh nongialam ba hakhlieh jong ka kynhun lehnoh Hamas bad ki jong ka Houthi na Yemen, ki la leit ban iakynduh bad ban shong jingialang haba iadei bad ka rai jongki namar ka jingbym sangeh shuh jong ka Israel ia ka thma ha Gaza.
Ki Hamas bad ki Houthi ki dei ki kynhun lehnoh kiba ju ioh jingkyrshan lang na ka Iran bad la ong ba baroh 2 tylli kitei ki kynhun lehnoh ki la pynpaw ka jingpyrshah jur halor ka jingbym sangeh shuh jong ka Israel ia ka jingleit hiar thma sha Gaza. La ong ba ki lehnoh Houthi lei ki la poi shaduh u pud ka jingia pyni bor bad ka US bad kumjuh ruh ka UK da kaba ther bom sha ki jhad kit mar jong kitei ki ri namar ka jingleit ai jingkyrshan jong ka United States sha Ukraine ba kan iakhun pyrshah ia ka Russia.
Ki lehnoh Houthi ki la thombor ia kat ki jhad kit mar kiba iaid lyngba ia ka duriaw Red Sea mynta la katto katne bnai naduh ka 7 tarik u Risaw ba ka thma ki lehnoh Hamas bad ka Israel ka la sdang.
Katkum ki jingtip ba la ioh lum, la ong ba kitei ki nongialam ka kynhun lehnoh Hamas bad Houthi ha ryngkat bad kawei ruh ka kynhun lehnoh kaba khlaiñ bha jong ka Palestine, ki la leit ban iakynduh lang bad ban shong pyrkhat kam haba iadei bad ka jingleit hiar thma ba khlem sangeh jong ka Israel pyrshah ia ki lehnoh Hamas kiba synshar hi ia ka nongbah Gaza jong ka Palestine mynta la bun snem. Ka kynhun lehnoh Hamas ka la ioh knieh ia ka bor synshar hapoh Gaza naduh u snem 2007.
