New Delhi, Lber:
Ka sorkar na ka por sha ka por ka la ïai ban da kaba ong ba ka la thrang bad kwah ban pynïaryngkat kyrdan ïa ki khynnah kynthei bad ki khynnah shynrang khamtam ha kaba ïadei bad ki kyrdan pule.
Ha kaba ïadei bad kane ka bynta, ka sorkar ka la plie ïa ki lad ki lynti ban ïoh pynrung skul lut ïa ki khynnah kynthei bad bthah ïa ki bor ba dei khmih ba kin pyntikna ha ka ban ïoh ban pynrung skul ïa baroh ki khynnah kynthei, khamtam ïa kito kiba la pep skul shiteng por.
Ka jingthmu jong ka sorkar ban pynrung ïa ki khynnah kynthei ha ki skul ka long shi bynta ban pynkupbor ïa ki bad ba kin ym shah ñion beiñ ha ba bun ki liang.
Kumba la sakhi, la ong ba ki la jan don kumba 1 lak ngut ki khynnah kynthei, ïa kiba la pep noh shiteng por ban leit skul na kiba bun ki daw, ki la ïohlad biang mynta ban leit skul, la ïathuh ki heh ba dei khmih.
Ki heh jong ka Union Women and Child Development Ministry ki la ong ba ha u snem 2013-14, ki jylla bad ki Union Territory ki la buh jingthoh ba ki la don kumba 1.14 klur ngut, hynrei ki la hiar sha ki 5 lak ngut ki khynnah ki bym leit skul shuh ha u snem 2020-21, sha ka 3.8 lak ngut ha u snem 2021-22 bad haduh ba la khmih khatduh ka la long da 1 lak ngut ha u Naitung jong u snem ba la lah.
Na ka jingkhmih bniah ha kaba ïadei bad ka jingpep skul noh shiteng por jong ki khynnah kynthei kiba don ha ka rta kaba 11-14 snem ka la pyni ba ki la don shibun ki jingdon jong ki nongïoh myntoi ki bym dei hok ban ïoh bad ka jingpynrung kyrteng thok, ïa kine baroh la dep ban weng bad pynbeit noh, la bynrap shuh shuh ki heh ba dei khmih.
“Kine ki 1 lak ngut ki khynnah kynthei ki la shah ïalam biang sha ka lynti kaba dei ha kaba ïadei bad ka pule ka puthi bad nangne ka skhim na ka bynta ki khynnah kynthei kiba la kham san la dep ban khmih bniah,” la ong u heh ba dei khmih, ïa u bym shym kwah ban pynpaw kyrteng.
Ïa kine ki sienjam la shim hadien ba ka tnat ba dei khmih ha u snem ba la lah ka la pynlong ïa ka Campaign ha baroh kawei ka ri ïa kaba la tip kum ka Kanya Shiksha Pravesh Utsav.
Ka jingthmu jong kane ka Campaign ka long ban pynleit skul biang ïa ki khynnah kynthei kiba la kham san ha kine ki rta katkum ka jingtreikam jong ki rukom pyntreikam ha kaba ïadei bad ka pule ka puthi.
Ka Scheme for Adolescent Girls ha ka rta kaba 11-14 snem ka la sangeh noh bad ïa ka skhim ba la pyntreikam thymmai la wanrah bad la kynthup lang hapoh ka Saksham Anganwadi (SAG) bad ka Poshan 2.0 Mission.
Ha kaba ïadei bad ka jingpynthymmai ïa ka SAG kaba la kynthup lang ïa ki khynnah kynthei kiba ha ka rta kaba 14-18 snem ka la don ka jingaijingkyrshan bad ha ki distrik kiba don ha ki bynta ba shaphang Shatei-Mihngi, ki la don kumba 22.40 lak ngut ki khynnah kynthei kiba la san ïa kiba la shah ithuh.
“Na ki 22 lak ngut ki khynnah, ka jingpyntreikam na ka bynta ban pynïoh Aadhaar ïa ki 19 lak ngut ka la ïaid shakhmat,” la ïathuh shuh shuh u heh sorkar ba dei khmih halor kane.
