Budapest, Lber:
U Myntri Rangbahduh ka Hungary, u Viktor Orban ha kane ka por u la phla ba u President barim ka United States u Donald Trump ha ka jingiakren bad u hadien ka jingialang ba dang shu dep long shen, u Trump u iathuh ba yn nym pynjaw wat tang shi tyngka ruh sha ka Ukraine lada dei ba ka bor ka shong ha u.
Namar la ong ba utei u nongialam u dei uba lah ban pyniadei bad ka Russia naduh ka por ba ka Russia ka leit ban hiar thma ia ka Ukraine bad u dang shu wan poi sha Florida ha kane ka taiew ba la leit ban leit kynduh ia u paralok ba jan tam eh jong u- u Trump.
Kumta, u Orban u la iathuh ba ha katei ka jingiakynduh jong u bad u Trump, u Trump u iathuh ba un nym ai wat tang shi tyngka ruh sha ka Ukraine.
Namarkata la ong ba lada u Trump un jop ia ka shuki President jong ka US ha kane ka sien, ka thma jong ka Russia bad Ukraine ruh ka lah ban kut noh namar dei na ka jingleit ai jingkyrshan jong ka US ba ka Russia ka leit hiar thma khlem sangeh ia ka Ukraine wat haduh kine ki sngi ba mynta.
Shuh shuh u la ong ruh ba lada ka America kam phah pisa sha Ukraine, tang ka Europe kam lah ban kyrshan marwei bad kan nym lah ban leh eiei ha katei ka thma. Bad la ong ba hangta katei ka thma kan sa kut noh.
Hynrei na ka liang jong u Trump pat, um shym la pynphai nia eiei haba iadei bad katei ka jingkren jong u Orban bad haba iakren bad ki lad pathai khubor, u Trump u la shu iathuh ba u Orban u long u briew uba khlaiñ ka jingmut jingpyrkhat bad u ong ruh ba utei u nongialam u don ka jingngeit kaba skhem ba ka thma jong ka Russia bad Ukraine kan ym rat da jia lada dei ba u Trump u don ha ka shuki President jong ka US ha kine ki snem.
