Islamabad, Lber:
U President ba thymmai jong ka Pakistan, u Asif Ali Zardari haba ai jingkren sha ki paidbah ka ri ha ki khyndiat sngi ba la leit, u la ong ba un nym treh ban shim ia ka tulop jong u mynta baroh kawei ka samoi treikam jong u ha kine ki snem bad ka daw jong kane ka rai jong u ka long ban iarap ban tehlakam ia ka jingduk kaba la wan lynshop ia ka Pakistan ha kine ki sngi.
Kumta, la ong ba u Zardari, uba la don 68 snem ka rta, u don ka jingthmu ban pyni nuksa sha kiwei pat ki nongialam jong ka ri ba kin leh kumno ban pynduna ia ka jingkit jong ka ri bad ban tehlakam ia ki jingeh kiba pyntroiñ ia ka ri ha kiba bun ki rukom bad kiba bun ki liang.
U Zardari u long u nongialam ba hakhlieh duh jong ka seng Pakistan People’s Party (PPP) bad u la wanrah shibun ki jingkular naka bynta ka roi ka par bad ka bha ka miat hapoh ka ri naduh ba u la ioh bat ia ka shuki President jong ka Pakistan.
La ong ba utei u nongialam u don ka jingkit khlieh kaba jur naka bynta ka ri bad namar kata u la rai ban ialeh ban pynsting ia ka ram ha ka ri bad kaba rit eh kaba u lah ban leh ka long da kaba un nym shim ia ka tulop shimet jong u kaba u dei hok ban ioh na ka kam ba u trei kum u President jong ka ri.
Katba, u President barim jong ka Pakistan- u Arif Alvi, u ju sei ia ka tulop kaba ? 8,46,550 man u bnai, kumba la buh da ka Iingdorbar thaw aiñ ha u snem 2018. Hynrei, la ong ba u Zardari u long uwei napdeng ki riew saiñ pyrthei ba riewspah tam hapoh Pakistan.
U Zardari, uba long u Co-Chairman jong ka seng Pakistan People’s Party (PPP), u la bam smai ban long u President jong ka Pakistan ha ka samaoi kaba ar hapoh ka tamasa pynbam smai ia u kaba la pynlong ha Aiwan-i-Sadr hapoh ka nongbah Islamabad ha kane ka Sngi U Blei ba la lah.
Haba iadei bad kane pat, la ong ba u Myntri ka tnat kam poh iing jong ka Pakistan, u Mohsin Naqvi ruh u la bud ia ki dienjat jong u Zardari bad ma u ruh u la pynbna ba u rai ban nym shim tulop shuh nangne shakhmat katba u dang don hapoh ka samoi treikam ba la buh. Kumjuh ruh haba iakren bad ki lad pathai khubor ha ryngkat ka jingiadon lang jong kiwei pat ki nongialam hapoh ka ophis treikam jong u ha katei ka sngi, u Naqvi u la pynpaw ka jingsngewkhia kaba khraw haba iadei bad ka jingdap ram bad jingduk kaba la wan lynshop ia ka Pakistan ha kine ki snem mynta.
