Jerusalem, Lber:
U Myntri Rangbahduh ka Israel, u Benjamin Netanyahu ha kane ka kynti u la bthah ia ki paid nongshong shnong kiba don Shathie jong ka Gaza Strip ba ki lah ban mih noh shwa na katei ka thaiñ shuwa ba ki shipai ka Israel kin leit rung ban hiar thma bad kurup noh ia katei ka thaiñ.
Kane ka khubor ka long ruh ha kum kane ka por ba u nongialam ka Germany- u Olaf Scholz u leit ban jurip bad u la pynpaw ruh ia ka jingsngewkhia halor ka jingeh bad jingma kaba la ktah jur ia 1.5 Million ngut ki nongshong shnong phetwir jong ka Gaza ha ka nongbah Rafah jong ka Gaza bad kiba la shu kylla phetwir naduh ba khie ka thma hapdeng ka Israel bad ka Hamas ha kane ka por.
