Shillong, Lber 18
Ka Sporting CC ka la pynliem noh ïa ka Sunrise CC da 3 wiket na ka bynta ban ïoh jingjop ha ka lympung ïalehkai Super Division Shillong Cricket League 2024 ha ka Lah Sngi U Blei ha madan Polo.
Ka Sporting CC ka la jop ïa ka kynting pisa bad ailad shwa ïa ka Sunrise ban tied nyngkong. Ka Sunrise haba wan tied ka la ïoh 147 run bad shah pynhap 10 wiket ha ki 37.3 over. U Pawan Kumar Singh u la tied 54 run na ki 89 bol bad u Vicky Shah u la ïoh 26 run na ki 40 bol. Katba u Santosh Prasad u la shim 4 wiket bad 2 wiket la shim da u Purav Agarwal na ka bynta ka Sporting.
Haba wan shimti ïa ka pali kaba ar, ka Sporting ka la lah ban kynjoh sha ka thong da kaba ïoh 151 run bad shah pynhap 7 wiket ha ki 35 over. U Manish Sharma u la tied 46 run na ki 59 bol bad u Purav Agarwal u la ïoh 31 run na ki 46 bol. Katba u Krishna Chettri u la shim 3 wiket bad 2 wiket da u Prince Thakur na ka bynta ka Sunrise. Ïa ka nam Player of the Match la khur da u Santosh Prasad.
