Shillong, Lber 18
Ka Real Madrid ka la nangjan ban ïoh soi ïa u Kylian Mbappe kum u rangïalehkai ba laitluid bad une u rangïalehkai ka France un long uba ar hadien u Endrick na ka bynta kane ka kynhun ïalehkai na Spain na ka bynta ka aïom ïalehkai ka ban wan.
Nalor u Endrick bad u Mbappe, ka Real Madrid ka la ithuh sa ïa uwei pat u rangïalehkai uba long uba biang ha ka bynta kaba shadien. U Alphonso Davies u long uwei napdeng ki rangïalehkai ha kaba ka Real Madrid ka la khmih lynti ban soi ïa u ha ka aïom lyiur.
U Davies u long u rangïalehkai uba la shah phaikhmat ha ka Real Madrid namar ka kontrak jong u bad ka Bayern Munich kan kut ha u 2025 bad une u rangïalehkai um kwah shuh ban dang ïai bteng ïa ka kontrak kaba thymmai. Ka jingshisha hi ka long ba u Davies u la pynpaw ba u kwah ban ïalehkai noh na ka Real Madrid.
Kat kum ki khubor la ong ba ka Real Madrid kan hap ban ap ïa u Davies haduh u snem 2025 lada ka Bayern ka dawa kham bun ka pisa ha kane ka aïom lyiur. Kane ka la wan kat kum ki khubor ba ka Bayern Munich ka lah ban dawa haduh €70 million na ka bynta ban pyllait ïa utei u rangïalehkai na Canada ha kane ka aïom lyiur.
Te kumta ka Real Madrid kam shym la don jingthmu ban siew ïa katei ka pisa kaba heh na ka bynta u Davies, hadien ba ka la pynkhreh na ka bynta ki rangïalehkai ba rem dor kata ïa u Mbappe bad u Endrick.
Te kumta kane ka kynhun ba khlaiñ bor na Spain ka lah ban hap haduh u 2025 na ka bynta ban soi ïa u Davies kum u rangïalehkai ba la laitluid.
Kawei ka lah ban pynshlem noh ia katei ka kynhun ba khlaiñ bor na Spain ka long ba utei u rangïalehkai na Canada um kwah shuh ban dangïai bteng ka jingïalehkai na ka Bayern Munich.
