Gaza, Lber:
Katkum ki khubor na Gaza ha kane ka por, la iathuh ba ki trok kit ata bad kiba kit mar bam ban leit pynpoi sha Gaza, ki la leit ban ïeng laiñ lypa ha khyrdop khappud jong ka Gaza katba dang ap ia ka jingiakren sangeh thma hapdeng ka Israel bad lehnoh Hamas.
Kumta la iathuh ba kumba 12 tylli ki trok ki la leit poi sha ka phang Shatei jong ka nongbah Gaza naduh ka miet Sngi Saitjaiñ bad la ong 6 tylli ki dei kiba la leit poi sha ka nongbah Gaza, katba 6 tylli pat ki dei kiba la leit poi sha ka thaiñ ba shong ki phetwir ha Jabalia. La ong ruh ba kitei ki trok ki dei ki ban pynpoi ia kitei ki mar bam sha ki paid nongshong shnong ba Shatei jong ka Gaza kum ka Beit Lahiya bad ka Beit Hanoun.
Namar la iathuh ruh ba ia kitei ki jingiarap ba la phah da ki ri bad ki tnat bapher bapher jong ka pyrthei ban sam sha ki paidbah nongshong shnong ka Gaza, la shimti bad leit sam ruh da ki committee ba la buh kyrpang ban pyniaid ia katei ka kam bad sam bam sha ki paid nongshong shnong. Bad ia kitei ki kynhun pat la leit ban pahara bad synran da ki bor pahara jong ka kynhun lehnoh Hamas hi khnang ba kan ym don kano- kano ka jingma ia kitei ki kynhun haba iadei bad ka jingleit hiar thma jong ki shipai ka Israel sha ki bynta bapher jong ka nongbah Gaza.
Namar la ong ruh ba ki tnat bapher ki la maham halor ka jingbym don jingim shuh hapoh Gaza bad ba kiba bun ki khyllung- khynnah ki la shu iap tyrsaw namar ka jingkyrduh bam wat ha ki jakasumar kiba dei ban ioh ban pynbiang ia ka bam bad ka umdih kaba khuid.
Kumta, ki ri bad ki tnat bapher ki la kynnoh bad kdew kti ia ka Israel halor katei ka jingïap thngan ki paid nongshong shnong ka Gaza bad ka jingjot jong ka Gaza namar dei ka Israel ka bym pynsngap ia ka jingkhot iakren ïasuk ban sangeh noh ia ka thma ha Gaza. Bad na ka liang ka Israel, ka la rai ban iakhun pyndep beit ia katei ka thma kumba ka la smai naduh ba sdang jong ka jingleit hiar thma nyngkong da ki lehnoh Hamas pyrshah ia ka Israel ha ka 7 tarik jong u Risaw 2023, ha kaba ka Israel ka la khie bitar halor katei ka jingleit thombor jong ki lehnoh Hamas bad ka la smai ba kan pynhiar kput bad kan pynduh- pyndam noh syndon ia katei ka kynhun lehnoh Hamas ha kane ka sien namar ka jingbym shngaiñ jong ka jingdon jongka bad kaba ap jingma ym tang ia ka Israel hynrei ia kiwei ruh ki ri ha ki por ki ban wan.
Ki lehnoh Hamas ki la shim ia ka jingim jong palat 1,200 ngut ki briew ha Israel ha ka por ba ki leit hiar thma ia ka Israel ha katei ka 7 tarik u Risaw jong u snem 2023 ba la leit. Nalor kane, ki lehnoh Hamas ki la rahbor ruh sa kumba 253 ngut ki briew na Israel naduh kiba dei ki nongshong shnong trai ka Israel haduh kiba nabar ka Israel hynrei kiba shu leit shong shipor ha Israel namar ki kam- ki jam jong ki ha katei ka ri.
