Shillong, Lber 18
Ka Cricket Lovers CC bad ka Thangsning CC ki la khur ïa ka jingjop ha ka lympung ïalehkai 3rd District League T20 Cricket Tournament 2024 ba la pynïaid da ka East Khasi Hills Cricket Association ha ka Lah Sngi U Blei.
Ha ka jingïakhun kaba nyng-kong kaba la long ha madan Smit, ka Cricket Lovers ka la pynliem ïa Marbisu CC da 66 run. Ka Cricket Lovers ka la kam trai ban tied nyngkong ha kaba ka la kamai 147 run bad shah pynhap 8 wiket ha ki 20 over. U Rohit Yadav u la tied 49 run na ki 34 bol bad u Winningstar Khongjoh u la ïoh 33 run na ki 28 bol. Katba u Richard Collin Diengdoh u la shim 2 wiket na ka bynta ka Marbisu.
Haba wan beh ïa ka thong ka Marbisu ka la ïoh tang 81 run hadien ba ka la shah pynhap 10 wiket ha ki 18.5 over. U Andy Alwin Dkhar u la tied 12 run na ki 15 bol. Katba u Mehraj Hussain Sarkar u la shim 4 wiket na ka bynta ka Cricket Lovers bad uba la ïohpdiang ruh ïa ka khusnam nam Player of the Match.
Haba phai sha kawei pat ka jingïakhun kaba ar, ka Thangsning CC ka la jop da 5 wiket ïa ka Mawryngkneng CC. Ka Mawryngkneng kaba la jied ban tied nyngkong, ka la ïoh 120 run bad shah pynhap 4 wiket ha ki 20 over. U Pyntngenlang Kharsahnoh u la tied 42 run na ki 66 bol bad u Lamhok Teiwsoh u la ïoh 35 run na ki 28 bol. Katba u Khrawkupar Kharumnuid u la shim 3 wiket na ka bynta ka Thangsning.
Haba wan shimti ia ka pali kaba ar, ka Thangsning ka la kynjoh sha ka thong da kaba ïoh 124 run bad shah pynhap 5 wiket ha ki 19.2 over. U Khrawkupar Kharumnuid u la tied 27 run na ki 29 bol bad uba la ïohpdiang ruh ïa ka nam Player of the Match. Katba u Lamhok Tiewsoh u la shim shi wiket na ka bynta ka Mawryngkneng.
