Shillong, Lber 18
Wat la u Bah Vincent H Pala uba dei u MP bad kum kyrtong ka Congress ban ïakhun ha ka ilekshon MP sha ka Lok Sabha u khlem wan satia sha ka lympung pyni nia da baroh ki kyrtong ki ban aireng ha ka ilekson MP kaba la pynlong da ka Sankardev College ha ka Lah Sngi U Blei, hynrei ha jaka jong u la wan mihkhmat da u Bah Manuel Badwar uba dei Secretary ka Meghalaya Pradesh Congress Committee (MPCC).
Haba ai jingkren ha katei ka lympung, u Bah Manuel Badwar u la ong ba ka long kaba donkam ban kynmaw khamtam kum ki briew kiba shong ba sah ha ka Ri ka bym don ka jingïadei bad ka niam ka rukom bad ruh ha kaba ïa ki kam sniew lah ban shna da kaba suk khamtam ka Ri kaba synshar da u paidbah ym kaba synshar da uwei pat u briew ban kynmaw ba ïa ka jingisih la pynkharoi bad ka jingkdew-kti ïa ki briew kiba don ha ki jait niam bapher-bapher bad ka la don ruh ka jingkdew-kti hapdeng ki jaitbynriew Khasi bad ki Garo.
U Bah Manuel u la kyntu ïa baroh ki briew ba ka por ka la dei ban pynduh noh ïa ki jingmut ban pynïaphiah jaitbynriew bad ba dei ban pynsangeh noh shisyndon ïa kiba kum kine ki bor ha ki jingmut jingpyrkhat jong ki briew.
“Ngi dei ban sngewthuh ba ka por ka la dei ba ngin pynkut noh ïa kine ki jingpynïapher jaitbynriew namar kane ka pynsniew ïa ka imlang ka sahlang baroh kawei”, la bynrap u Bah Manuel.
Shuh shuh u la ong ruh ba kane ka jinglong ka la sdang ban rung ha ka jaka treikam jong ka skulbah North Eastern Hill University (NEHU) ban pynkheiñ ïa ka jingngeit blei da kaba ïaleh ban phah trei wat ha ka Sngi U Blei ruh kaba pyni ïa ka jingbym burom ïa ka rukom ngeit ki briew kiba im hapoh ka imlang ka sahlang hapoh ka jylla.
Nalor nangta, u Bah Manuel u la jer ïa ki jingangnud bad ka thong jong ka Congress ba ka kwah ban kren ha kane ka ilekshon MP ka ban wan da kaba pynkynmaw ba ka Ri India ka la kot sha kata ka 3 trillion dollar ka rukom ïohnong bad ha ki 5-10 snem ban wan kan sa ïoh ban don ha ka kyrdan kaba ar. U la ong ruh shisien hi ba la kiew ka jingïohnong ha ka Ri, kan ïai kiew beit katkum ka jingïaid jong ka por.
