Ka ilekshon MP Lok Sabha ha Meghalaya ka kham i shongshit ha kane ka kynti haba ïanujor bad ki snem kiba mynshwa. Bunsien, ka ilekshon MP ka long kaba blem-blem, dait-thah wat hapdeng ka jingshit ka mariang, bad ka bym ju lah ban pynshongshit ïa ki paidbah ba kin leit thep ‘vote’. Bun kiba kyrngah ban leit sha ki jaka thep ‘vote’ bad ki jied da kaba shu shong ïing ne leit khwai ne leit kai bam lyer pyngngad. Sha ri thor, khamtam ha ki jaka sor, ka ilekshon MP ka long kaba pjah bha wat la ka jingshit sha kito ki jaka kam dei kaba kai. Bun kim ïa treh ban mih namar kim da sngewdonkam ïa uta u MP.
Ha ka ilekshon MP ha u snem 2019, ki nongthep ‘vote’ kiba la pyndep ïa la ka jong ka kamram bad ka hok ki long 65.48 na ka 100 ha Shillong Parliamentary Constituency bad 81.38 na ka 100 ha Tura Parliamentary Constituency, bad haba kheiñ kyllum, ki paidbah kiba la jied ïa ki MP na ar tylli ki konstitwensi ki long 71.43 na ka 100. Donbok ba ki paidbah na Rilum Garo ki la ïa mih kham bun, hynrei la sngewlehraiñ khamtam haba peit ïa ka jingjaituh ki paidbah ka Shillong Parliamentary Constituency ban leit jied MP. Ha u snem 2014, ha Shillong Parliamentary Constituency, ki nongthep ‘vote’ kiba la pyndep ïa la ka kamram ki long 63.28 na ka 100 katba ha Tura ki long 79.14 na ka 100, bad haba kheiñ kyllum, baroh kiba poi ban thep ‘vote’ ki long 68.84 na ka 100. Hangne ruh, ki kham khlaiñ ki paid Garo ban ïa thep ‘vote’. Mynta ka kynti pat kan long kumno?
Ka Election Commission jong ka Ri India (ECI) ka la pynbna ïa ki tarik thep ‘vote’ ban jied ïa ki 543 ngut ki MP sha ka Lok Sabha. Kane ka ilekshon kan long haduh hynñiew bynta bad kan sdang naduh ka 19 tarik Ïaïong bad kan kut ha ka 1 tarik Jylliew katba ka jingpynbna ïa ki nongjop kan long ha ka 4 tarik Jylliew. Ha kane ka ilekshon, kin don haduh 96.8 klur ngut ki nongthep ‘vote’ ki ban jied ïa 543 ngut ki MP ha ka Ri baroh kawei. Ha Meghalaya, ka jingdon ki nongthep ‘vote’ ka la kiew da 55,971 ngut ha ka shi snem, kata, hapdeng u snem 2023 bad u 2024. Ka jingdon ki nongthep ‘vote’ baroh, kata, shynrang, kynthei bad ki ‘Third Gender’ ka long 22,17,100 ngut.
Na kine, 10,94,947 ngut ki dei ki shynrang, 11,22,150 ngut ki dei ki kynthei bad lai ngut ki dei ki ‘Third Gender’. Namarkata, ka jingdon ki kynthei kum ki nongthep ‘vote’ ka tam da 27,203 ïa ki shynrang. Na kitei ki 22,17,100 ngut, ha ka Shillong Parliamentary Constituency kaba kynthup ïa ki 36 tylli ki konstitwensi MLA, ki don 13,96,054 ngut ki nongthep vote, katba ki nongthep ‘vote’ ha Tura Parliamentary Constituency kaba kynthup ïa ki 24 tylli ki konstitwensi MLA ki don 8,21,046 ngut ki nongthep ‘vote’. Kane ka long katkum ka thup kyrteng jong ki nongthep ‘vote’ kaba la pynmih ha ka 5 tarik Kyllalyngkot, 2024. Ha Shillong, ki shynrang ki don 6,81,769 ngut bad ki kynthei ki don 7,14,283 ngut. Ha Tura pat, ki shynrang ki don 4,13,178 ngut katba ki kynthei ki kham duna ban ïa ki shynrang bad ki don 4,07,867.
Ka long shisha ka ilekshon kaba jrong bad ka ECI ka la dei ban leh sani bha ban pynlyngkot na ka hynñiew bynta sha ka saw ne san bynta. Ki nongthep ‘vote’ banyngkong kin pyndep ïa la ka kamram ha ka 19 tarik Ïaïong bad kiba khatduh ha ka 1 tarik Jylliew. Ngim ïohi ba kan don jingmut ban pynjlan haduh katne-katne ïa ka ilekshon namar ka jingpynbna ïa ki nongjop kan long haduh ka 4 tarik Jylliew. La sngewthait lypa ban ïa ap ïa kata ka sngi pynbna ïa ki MP bathymmai! To kam pher jait ba ka ECI ka la dep ban pynbna, bad mynta ka shong sa ha ka mon jong ki paidbah la kin ïa mih ryntih ban jied ïa la ki jong ki MP ne kin ïa kyntait. Ha kane ka sien ngi kyrmen ba ka jingdon ki nongthep ‘vote’ ki ban pyndep ïa la ka kamram kin kham bun ban ïa kaei kaba la long ha u snem 2014 bad 2019. To ïa mih paidbah ban ïa leit sha ki jaka thep ‘vote’ ha ka 19 tarik Ïaïong, wat pynsepei ïa ka por bad ïa ka hok lajong namar kaba kum kane ka kabu ka wan tang shisien ha ka san snem. Long ki nuksa kiba bha na ka bynta ki pateng ki ban wan khnang ba ma ki ruh kin ïa ïoh mynsiem lem na phi. Wat ïa kut tang ka jingkhñium ha ïing, hynrei long hi kata ka jingkylla kaba phi kwah ban ïohi.
