Kentucky, Lber:
Ki pulit ka Kentucky ha kane ka por ki dang pynlong ka jingtohkit bniah halor ka jingkhlad jong uwei u khynnah skul 8 snem hadien ba u la bam ia u sohshan ha ka por ba pynlong ia ka prokram pynmih pisa na bynta kawei ka skul kaba u pule ha kine ki khyndiat sngi ba la leit.
La iathuh ba utei u khynnah u la kem pang jur hapoh ka iingsah jong u ha ka Sngi Thohdieng jong ka taiew ba la dep, tang hadien ba u la bam ia utei soh ba thied ne ki dukan kiba la buh ha katei ka skul ha ka prokram pynmih pisa ‘Fundraiser’ ha katei ka sngi. Kane ka la jia ha ka Madisonville North Hopkins High School kaba don hapoh Kentucky.
Na ka liang ki bahaiing jong utei u khynnah ki iathuh ba utei u khynnah ynda u la poi ha iing, u la pynpaw ia ki dak shitom kumba ju long ia kiba kynjing ne khohñioh mynsiem ban bam ia ki jingbam ki bym da sngewtynnat bad la iohi ruh ia ki kynja khñiang symparbret ha ka met jong u tang mar ia poi ha iing. Namar ba u kham shitom bad leh thlia palat, ki bahaiing ki la leit rah noh ia u sha ka jaka sumar kaba kham hajan ha ka por 10:30 jong katei ka miet Sngi Thohdieng bad hadien kata la wallam noh ia u sha iing.
Ki pulit ki la iathuh ba ki kmie- kpa jong utei u khynnah ki la pyntip mar-mar sha ki pulit jong katei ka thaiñ hadien ba utei u khynnah um kyndit bynriew shuh naduh ka por ba u wanphai sha iing na katei ka jingleit jong u sha skul.
Hadien ka jingkhlad jong utei u khynnah, ka tnat ka koit ka khiah jong katei ka nongbah ka la pyntip ba ka jingkhlad jong utei u khynnah ka lah ban long namar ka jingbym ïahap jong u ban bam ia utei jait soh. Katba na ka liang ki bor pyniaid ki dang phah wad bniah ruh ioh utei soh u dei ba la sniew ne khleh dawai bun jait bad kaba long ka jingma kaba khraw ia kiwei ruh ki khynnah kiba leit thied bad bam ia utei soh ha katei ka prokram pynmih pisa ba la pynlong ha katei ka sngi.
Hynrei kaba eh ka long ba ki bahaiing ruh kim ju iohi ba utei u khynnah un don ka jinglong ba ipher ne bym sngewtynnat ban bam ia kitei ki jait soh baroh shi katta.
Hadien ka jingkhlad jong utei u khynnah, ka tnat Hopkins County Health Department ka la phah ia ka jingmaham sha ki paidbah lyngba ki rynsan ‘Social Media’ ba dei ban kiar ia utei u jait soh ba la die ha katei ka dong Hopkins County ha kum kine ki por katba utei u jait soh u dang buh jingma ia ka met bad ka jingim briew kumba la sakhi ia katei ka jingjia ha kane ka por.
