Nongstoiñ, Lber 18
Ka West Khasi Hills District Boxing Association ka la ai khublei kitbok kitrwiang ïa ar ngut ki ‘thei ïakura na West Khasi Hills ki ban leit shim bynta ha ka 3rd Sub Juniors Boy’s & Girls National Boxing Championship ka ban long ha Noida, Utter Pradesh mynta u bnai.
Kine ar ngut ki long ka Isawanbiang Nongsiej na ka shnong Tiehsaw Nongstoiñ ha ka kyrdan ïakhun jong ka 35-37kg ka ban mihkhmat ha katei ka rynsan ïakura ka ban long ha Noida.
Katba kawei pat ka ‘thei ïakura na Upper New-Nongstoiñ ka Veronica Sohshang ha ka kyrdan 45-46kg ka ban leit ïashim bynta ha ka 3rd North East Olympic Game kaba sdang mynta ka sngi ha Nagaland.
Te kumta na ka liang u President ka WKHBA u Bah Despitol Sun u la pynpaw ka jingkhmih lynti ba kitei ki ar ngut kin lah ban ïalehkai bha ha kitei ki rynsan kiba heh jong ka ri bad ruh ha ka thaiñ shatei lammihngi.
U la ong ruh ba ka seng ka sngewdei ban ai khublei ïa ka Meghalaya Boxing Association (MBA) halor ka jinglah jong ka ban kyntiew ïa ki thei bad ki ‘rang ïakura ka Jylla lyngba kiba bun ki jingïakob ïakura lada dei ha ka jylla lane ha ki rynsan ïakob ba heh duh jong ka ri.
