Shillong, Lber 18
Ka Rangdajied United FC ka la ïoh ïa ka jingjop kaba nyngkong ha ka lympung ïalehkai Shillong Premier League 2023-24 ba la pynïaid da ka Shillong Sports Association, hadien ba ka la lah ban pynliem noh ïa ka Nongthymmai S&CC.
Kane ka nam jop ka wan urlong lyngba u Ksankupar Khongmalai na ka bynta ban pynlong ïa katei ka lahduh jong ka Meghalaya State League ban ïoh ïa ki lai point.
Ha ka jingshisha kane ka lympung la dei ban pynlong ha ki shiphew bnai jong u snem ba la dep, hynrei na ka daw bym don madan ïalehkai la hap ban pynsangeh shwa. Kumta hadien ba ka synjuk ïalehkai jong ka SSA ka la ïoh la ka jong ka madan ïalehkai kan sa ïoh ban pynlong ïa kane ka lympung kata tang ha ka wat kaba nyngkong (1st leg).
Ha kane ka kynti kaba mynta yn nym don ki kynhun ki ban shah pynhiar kyrdan. Ki saw tylli ki kynhun ki ban wan ha ka thup kaba saw (top four) kin ïoh rung sha ka semi final bad ruh kin ïoh rung ruh sha ka Meghalaya State League ban sa pynlong shen da ka Meghalaya Football Association.
Ha kane ka jingïakhun kaba la long ha ka Lah Sngi U Blei ha SSA Stadium baroh ar ki kynhun ki la pyrshang ban ïakhun naduh kaba sdang ha kaba kim shym la lah ban thep kol haduh kaba kut jong ka kylla step. Dei ha ka kylla miet ba ka Rangdajied ka la ïoh ban pynkhih jar lyngba u Ksankupar ha ka minit kaba 61. Haduh kaba kut ka Nongthymmai kam shym la lah ban pynphai bad ka la mad ïa ka jingshah rem.
Ka jingïalehkai ha ka sngi Ba-ar kan long hapdeng ka Sawmer SC pyrshah ïa ka Nangkiew Irat SC ha ka por 3 baje janmiet.
