Aizawl, Lber:
Ka jingthep vote na ka bynta kawei ka Lol Sabha konstitwensi ha Mizoram kan sa long ha ka 19 tarik, Ïaïong, la ïathuh u heh sorkar ha Aizawl. U State Chief Electoral Officer (CEO) u Madhup Vyas u la ong ba ka Election Commission ha ka sngi Saitjaiñ ka la dep ban pynbna ba ka jingthep vote na ka bynta ki 543 tylli ki Lok Sabha konstitwensi ha ka ri kan sa long ha ki 7 bynta bad ka Mizoram kan sa thep vote tang ha kawei ka konstitwensi ha ka bynta kaba nyngkong kata ha ka 19 tarik, Ïaïong.
Ka jingñiew ïa ki vote kan sa long ha ka 4 tarik, Jylliew, u la ong. Ka tarik kaba khatduh ban thep kyrteng kan sa long ha ka 27 tarik, Lber, katba ka tarik kaba khatduh ban weng kyrteng kan sa long ha ka 30 tarik, Lber. Ka jingkhmih bniah ha kaba ïadei bad ki kot pynrung kyrteng kan sa long ha ka 28 tarik, Lber. U Vyas u la ong ba ki la don palat 8.6 lak ngut ki nongthep vote, kynthup ïa ki 4.41 lak ngut ki kynthei ki ban sa ïashim bynta ha ka jingthep vote ha ka ilekshon Lok Shabha ban wan ha ka jylla.
Napdeng kine ki 8.6 lak ngut ki nongthep vote, ki la don kumba 36,214 ngut ki samla kiba don ha ka rta kaba 18-19 snem, 4,758 ngut kiba la kham san, kata kiba naduh 85 snem shaneng, 3,399 ngut ki dei ki briew kiba don jingduna dkhot met bad 4,980 ki shipai bad kito kiba trei shabar ka ri India, u la ong. Ki la don kumba 1,276 tylli ki jaka thep vote ha kylleng ka jylla, la ong u CEO.
U la ong ba ki la don kumba 15 tylli ki kynhun jong ki shipai Central Armed Police Forces (CAPF) ha ryngkat ki 3,000 ngut ki pulit ka jylla ki ban sa shah pyntreikam ha kylleng ka jylla ha ka por ba don ka ilekshon Lok Sabha ka ban sa wan.
U CEO u la pan ruh ka jingïatreilang kaba ïaid beit, ka jingïatreilang kaba ïajan bad ka jingsngew ïajan bad kiwei pat ki riewpawkhmat, khamtam bad ki kynhun jong ki lad phah khubor, ha ki kam ba ïadei bad ka ilekshon bad ban ïaleh ban wanrah ïa ka jingpyntreikam kaba ïaid beit-ïaid ryntih, ban wanrah ïa ka jingsuk bad ban ïashim bynta da ka jingsngew laitluid ha ka ilekshon Lok Sabha.
