Shillong, Lber 18
Kawei na ki nongñiah kali ba paw ka Jylla, ka Phoebe Dale Nongrum ka la lah ban pynpaw ïa ka jingtbit ha ka rukom ñiah kali jong ka Indian National Rally Championship (INRC) 2024 kaba la long ha Chennai.
Ha kane ka jingïakob la wan ïashim bynta da 51 tylli ki kali ha la ki jong ki kyrsan ïakob. Kumta ka Phoebe ka la lah ban rah ïa ka nam jop ha ka INRC-3 category (Ladies Category) na ka bynta ka Volswagen Polo ha ryngkat u paralok ba ïañiah lang u Nash Ross uba na Hyderabad, hadien ba ki la lah ban pynliem noh ïa ki nongjop jong mynshem snem.
Da kane ka jingjop, ka Phoebe ka la don ha ka kyrdan ba 13 haba kheiñ lang baroh bad ba phra ha ka INRC -3 category.
Na ka liang ka Phoebe ka la pynpaw ba kane ka jingïakob ka la long kaba kham eh. “Kane ka jingïakob ka long kaba kham eh bha ïa nga naduh ba nga la ïashim bynta nyngkong ha kane ka jingïakob kaba stet bha bad kaba don ïa ki nongñiah kiba kynsai. Te kumta nga la ïoh shibun ki jingmyntoi ha ka rukom ñiah kali bad nga la khmih lynti ban ïashim bynta biang ha ka wat kaba ar jong kane ka jingïakob.”
Nalor nangta, kane ka nongñiah kali ka la pynpaw ka jingai khublei ïa ka tnat ïalehkai jong ka Sorkar Jylla khamtam ïa ka Director ka Kong Isawanda Laloo kaba la kyrshan ïa ka lem bad ka President ka Meghalaya Motorsports Society ka Kong Easter Kharkongor.
