Agartala, Lber:
Uwei u briew uba la shah suba ba u la long u nongkhaïi mar beaiñ uba dei u nong Bangladesh u la shah pynïap katba uwei pat u la mynsaw na ka jingdei kuli hadien ba ki la pynibor pyrshah ïa ka kynhun jong ki shipai Border Security Force (BSF) ha Unakoti distrik kaba don ha Tripura.
Kane ka jingjia ka la jia ha ka por ba ka kynhun jong ki shipai BSF ka la leit ban thwet ïa ka kynhun jong ki briew kiba thmu ban khaïi beaiñ ha ka sngi U Blei ha ka shnong Magroli, kaba don ha Unakoti distrik.
Kumba la ïathuh ka tyllong khubor kaba la wan na ka tnat BSF la ong ba katba ki dang don ha ka jingtreikam ban leit shajan ki jingker khappud kaba don ha BOP Magroli, ki shipai ki la ïohi ba la don ka kynhun jong ki briew kiba ïadon hapdeng 15-20 ngut ha kaba kine ki la thmu ban wan sha ki bynta jong ka ri India, ha ryngkat ki jingkit ha ki khlieh jong ki, katba kawei pat ka kynhun jong kumba 25-30 ngut ki briew ki la thmu ban rung na ka liang jong ka Bangladesh ha ryngkat ki jingkieng siej.
“Wat lada la ai ïa ka jingmaham na ka liang jong ki shipai BSF pyrshah ïa ki, ka kynhun jong kine ki runar ka la ïaleh pyrshah bad kerkut ïa ka kynhun jong ki shipai. Naba la sngewthuh ba la don jingma ïa ka jingim bad ki jingjulor jong ki jingdon jingem jong ka sorkar, ka kynhun jong ki shipai, ka la siat ïa ka kynhun jong kine ki nongkhaïi tuh ha kaba u kuli u la leit dei ïa uwei ha kaba lajan ïohkem ïa u”, la ïathuh ka tyllong khubor.
Ha kaba ïadei bad kane ka jingjia la ïathuh shuh shuh ba kawei pat ka kynhun jong ki 10-15 ngut ki la pynibor kylla ïa uwei na ki shipai BSF bad pyrshang ban knieh ruh ïa ka tiar siat jong u. Ka tyllong khubor ka la ïathuh ba kine ki briew ki la pyrshang ban rah ruh ïa u sha ki bynta jong ka ri Bangladesh.
Sa shisien ki shipai ki la siat biang ïa u bad une uba la shah pynmynsaw u la lait ban phet sha ki bynta jong ka ri Bangladesh.
Ha ka por ba la don ka jingïaleh, uwei u shipai BSF u la mynsaw bad la pynkit ïa u sha ka jaka ai jingsumar kaba marjan bad ka jaka ba la jia ka jingjia, ha kaba mynta u la kham ïoh bor.
Ka tyllong khubor ka la bynrap shuh shuh da kaba ong, “Ha ka jingpynphai kylla ïa ka jingsiat uwei u nong Bangladesh ïa uba la tip kyrteng kum u Saddam Hussein, na ka shnong Dastaki, kaba don ha Moulovibazar distrik, u la shah siat bad la pynbna ba u la khlad noh ha ka por ba u la poi ha ka jaka ai jingsumar.”
