Jerusalem, Lber:
Ka sorkar Israel ha ka Sngi U Blei ka la pynbna ba ka ri kan pynsah kynmaw ia ka 7 tarik, u Risaw kum ka sngi ba kyrpang ia ka ri namar ka jingshah hiar thma bad jingshah thombor ki paid nongshong shnong ha ki lehnoh Hamas.
Ban kynmaw ia katei ka sngi, la ong ba ka sorkar Israel kan sa pynlong ia ka jingrakhe kaba kyrpang ban buh dak bad pynsah kynmaw ia ka jingshah thombor jong ka Israel ha kitei ki lehnoh jong ka ri Palestine bad kaba la wanrah ruh ia ka thma kaba jur hapdeng ka Israel bad ka nongbah Gaza kaba la synshar hi da ki lehnoh Hamas naduh u snem 2007 ba ki la ioh ban knieh ia ka bor synshar na ka sorkar Palestine ha katei ka nongbah. Ki lehnoh Hamas ki la ioh knieh hi ia ka bor synshar na ka sorkar Palestine ha katei ka nongbah Gaza naduh u Jylliew 2007.
Ha katei ka sngi ba kyrpang ban rakhe bad kynmaw burom, la ong ba ka Israel kan rakhe bad leh burom ha ar tylli ki bynta. Kawei kan ong ban pyndonburom ia baroh ki shipai ka ri kiba la kyllon iap hapdeng ka jingiakhun bad kitei ki nongshun kiba wan ban thombor ia ka ri ha katei ka thma. Katba kaba ar pat, ka long ban pyndonburom bad kynmaw ieid ia kito ki paidbah kiba la duh ei ia ka jingim na katei ka jing-leit hiar thma jong ki lehnoh Hamas sha Israel ha katei ka sngi (7 tarik u Risaw 2023).
Ha katei ka sngi ka jingleit thombor ki lehnoh Hamas pyrshah ia ka Israel, la ong ba kumba 1,200 tam ki nong Israel ki la duh ei ia ka jingim. Ym tang katta, hynrei ki lehnoh Hamas ki la rahbor ruh sa kumba 250 tam ki briew na Israel bad kumjuh ruh ki bym dei ki nong Israel hynrei kiba don ha katei ka ri ha katei ka por ka jing-leit hiar thma ki lehnoh Hamas ia ka Israel.
