Nongpoh, Lber:
Kawei na ki jaka thep umphniang kaba heh tam ha ka thaiñ Shatei Lam-mihngi, ka NES Jorabat jong ka kompani Bharat Petroleum Corporation Limited (BPCL) ha ka Sngi U Blei ka la ïoh ban rakhe ïa ka jingdap 18 snem kynthih ka jingshakri naduh ba la plie nyngkong ha u snem 2006.
Ha kane ka sngi la wan ban ïadon ryngkat da u Bah A.L Hek, Myntri ka sorkar jylla ba dei peit ïa ka tnat Animal Husbandry and Veterinary lem bad u nongrwai ba pawnam ka karkhana Bollywod, u Zubin Garg.\
Kum shi bynta na ka jingrakhe dap 18 snem, kane ka jaka thep umphniang kaba ïaid ïew tam ha ka thaiñ Shatei Lam-mihngi ka la ïoh ruh ban pynheh shuh ïa ka jaka thep umphniang kaba kyrpang na ka bynta ki kali rit kaba la plie paidbah da u Bah A.L Hek ha ka jingdon ryngkat ki heh ophisar ka kompani BPCL ba kynthup ïa u BJ Phukan, Managing Director ka NRL, u Debashis Naik, Head Retail East ka BPCL, u Shripal Jain kum trai jong ka jaka thep umphniang, u Bah Sambor Diengdoh lem bad kiwei kiwei.
Kum ban shu kdew hangne, kane ka jaka thep umphniang kaba don ha Jorabat ka dei ruh kaba nyngkong eh ha ka jylla ban buh ïa ka jaka charge (Electric Charging Station) ïa ki kali ba pyndonkam lyngba ka bording ilektrik ïa kaba la plie da u Bah AL Hek ha ka 30 tarik u Lber, 2023.
Haba ai jingkren ha kane ka sngi, u Bah A.L Hek u la pynkynmaw ïa ka jingïaid lynti kaba 18 snem jong kane ka jaka thep umphniang kaba la kiew sted bad ïarap ruh ban aikam aijam ïa kumba 150 ngut ki khynnah kynthei Khasi ha kine ki 18 snem kynthih bad kaba ai ruh ïa ka jingshakri kaba paka sha ki paidbah nongleit nongwan bad kaba la donkam ban nang pynïar shuh shuh namar ka jinglah jong ka ban ai ïa ka jingshakri kaba paka.
Na ka liang ki heh ophisar ka BPCL kiba la ai jingkren ha kane ka sngi, ki la ai ka jingïaroh ïa kane ka jaka thep umphniang halor ka jinglah jong ka ban long kum kawei na ki jaka thep umphniang kaba ïaid ïew tam ha kane ka thaiñ baroh kawei. Ym tang katta, hynrei ka la lah ruh ban pynhun ïa ki paidbah nongwan thep umphniang lyngba ka jingdon ki jaka leit shabar kiba khuid ba suba, ka jaka dih kophi, ka jaka pynïeng kali kaba heh bad kiwei kiwei jingdonkam.
Ki heh ophisar ka BPCL ki la ïathuh ruh nalor kitei ki jingdonkam kiba pynhun ïa ki paidbah nongwan thep umphniang, ka kompani BPCL ka la pynmih ruh ïa ka Ustaad Loyalty Programme, ka Double Dhamaka skhim ban ai jingmyntoi ïa ki paidbah nongwan thep umphniang ryngkat ka lottery ruh kumjuh bad ba kum ka kompani ka don ruh ïa ka jingthmu ban buh sa ka jaka thep CNG ïa ki kali ha ki por ban wan.
Ha kane ka sngi la pynphuh-pynphieng ruh lyngba ka jingshad Bihu, kawei na ka jinglehniam ba kongsan tam jong ka jylla Assam ryngkat kiwei kiwei ki jingshad bad jingrwai na ki nongtrei bad ruh na ki samla jong ka shnong.
