Ka Hynñiewtrep National Liberation Council (HNLC) ka la pynbna ha ka 3 tarik Kyllalyngkot, 2024 ba ka la weng noh na ka jingïakren ïasuk bad ka Sorkar India bad Sorkar Meghalaya hadien ba ym shym la pdiang ïa ki jingdawa jong ka seng. Dei ha u Rymphang 2022 ba ka HNLC ka la tyrwa ban ïakren ïasuk bad ka sorkar khlem da buh kyndon, bad ka sorkar Meghalaya hapoh ka jingïalam jong u Conrad K Sangma ka la pdiang sngewbha ïa kane. Na ka liang ka HNLC ka la thung ïa u President ka Hynñiewtrep National Youth Front (HNYF), Bah Sadon Blah, ban long kum u nongmihkhmat ka seng ha ka jingïakren katba ka Sorkar India bad Sorkar Meghalaya ki la thung ïa u AK Mishra bad u Bah Peter S Dkhar kum ki ksiang. Hashwa ban sdang ka jingïakren bapura (Formal Peace Talks), ka la don ka jingïakynduh hapdeng ki ksiang bad ki nongïalam ka HNLC. Ka sien banyngkong ba ki nongïalam ka HNLC ki la sdang ïa ka jingïakren bapura bad ka Sorkar India bad Sorkar Meghalaya ka dei ha ka 24 tarik Jylliew, 2023.
Hynrei, ha ka 9 tarik Lber, 2024, uwei u bom ‘Improvised Explosive Device’ (IED) u la bthei ha Them Metor/Them Ïew Mawlong ha ka por mynmiet, bad hadien katto katne sngi, ka HNLC ka la wan shakhmat ban shim jingkitkhlieh da kaba pynbna ba ka dei ka ‘Budnar Shadow Squad’ (BSS), kaba long ka ‘Special Force’ jong ka seng, kaba la donkti ha katei ka jingjia. Haduh mynta, ki pulit ki la ïoh kem ïa lai ngut ki briew ba la suba donkti ha katei ka jingjia bad uwei na ki, u dei u dkhot ka seng HNYF. Nalorkata, ki pulit ka Ri-Bhoi ki la kem ïa saw ngut ïa kiba la kynnoh ba ki dei ki dkhot ka ‘Sleeper Cell’ ka HNLC bad la ong ruh ba ki la thmu ban pynbthei bom ha Nongpoh bad Shillong.
Lah ruh ban kdew ba hapdeng jong ka jingïakren ïasuk ha u snem ba la lah, ka HNLC ka la pynbna ba u Vice-Chairman ka seng, uba la ïalam ïa ka kynhun ban ïakren, u Manbhalang Jyrwa, u la iehnoh kam, bad ha ka jaka jong u, ka seng ka la thung noh ïa u Teimiki Laloo. Ym tang katta, ka HNLC ka la pynpaw ïa ka jingpyrshah halor ka jingshah khot hajir jong ki nongïalam ha ki ïingbishar ha kaba ïadei bad ki mukotduma ba don pyrshah ïa ki, bad ki la dawa na ka sorkar ba ka dei ban weng noh shwa ïa kine ki mukotduma. Ka sorkar ka la pynpaw ruh ïa ka jingkwah jong ka ba u Chairman & Commander-in-Chief ka seng, u Bah Bobby Marweiñ lem bad u General Secretary & Publicity Secretary, u Bah Saiñkupar Nongtraw, ki dei ban wan lang sha ka miej jong ka jingïakren. Hynrei ka HNLC ka la kren shai ba katba ka sorkar kam pat weng ïa ki mukotduma pyrshah ïa u Bah Bobby bad u Bah Saiñkupar lane katba ym pat pynbiang ïa ka saiñdur jong ka soskular sangeh ïasiat, kine ki nongïalam kin ym wan shakhmat ban ïashim bynta ha ki jingïakren.
Haduh mynta, ka Sorkar India kam pat ong eiei naduh ba ka HNLC ka la pynbna ban weng na ka jingïakren ïasuk, bad na katei ka jingjia ha Them Metor/Them Ïew Mawlong, ka paw ba ka jingkyrmen ba ka jingïakren ïasuk hapdeng ka HNLC bad ka Sorkar India bad Sorkar Meghalaya ka la sdang ban jah. Nalorkata, ka HNLC ka la dep bna ai por shi bnai ïa ka Sorkar Meghalaya ba kan pynkynriah noh ïa kiba shong ba sah ha Them Metor sha kawei pat ka jaka kaba dei jong ka sorkar. Ngim tip ka sorkar jylla kan leh kumno halor kane ka bynta watla ki jingïakren ban pynkynriah noh ïa kiba shong ba sah ha katei ka jaka ka la ïaid naduh 2018, bad ka la don ruh ka jingmynjur ban pynkynriah ïa ki nongtrei sorkar kiba don ha Them Metor sha ka shlem treikam barim jong ka Shillong Municipal Board.
Ha kine ki snem kiba la leit noh, ngi la ïohi ba ka HNLC ka la donkti ban pynbthei bom wat haduh ha nongbah Shillong. Ki la long ki sngi kiba la pynsyier ïa kiba bun ba lang. Don napdeng jong ngi kiba dang kynmaw ïa kito ki sngi bad ki snem ba ki dkhot ka HNLC ki la kieng atiar bad leh ïa ki kam kiba la ktah ïa ka jingsuk. Ha ka jingshisha, ym don shuh ki ban dang kwah ban ïohi ïa kito ki sngi bad ki por. Hynrei haba ka sorkar kam pdiang satia ïa ki jingdawa jong kane ka seng, ka HNLC ruh ka sngew ba kam don jingmut ban bteng ïa ka jingïakren ïasuk. Lehse ka sorkar Meghalaya kan sa nang pyrshang ban phah khubor sha ki nongïalam ka HNLC ba kin bteng ïa ka jingïakren namar kin don bun ki jingeh hadien habud lada ka sorkar kam pyrshang ban wanrah biang ïa ka seng sha ka miej jong ka jingïakren. Lada ka sorkar ka pulom, ngin sa nang mad jingeh ha ki sngi ki ban wan.
