Shillong, Lber 19
Ka Nongdawah CC bad ka Pomshutia CC ki la khur ïa ka jingjop ha ka lympung ïalehkai 3rd District League T20 Cricket Tournament 2024 ba la pynïaid da ka East Khasi Hills Cricket Association ha ka sngi Ba-ar.
Ha kane ka jingïa-khun kaba la long ha madan ïalehkai kaba ha Smit, ka Nongdawah ka la pynliem noh ïa ka Mawphlang CC da 75 run. Ka Nongdawah kaba la kam trai ban tied nyngkong, ka la kamai 156 run bad shah pynhap 7 wiket ha ki 20 over. U Fillstarwell Nongpluh u la tied 40 run na ki 35 bol bad u Moonlight War u la ïoh 36 run na ki 16 bol. Katba u Mawlynnai Wah -lang u la khur 3 wiket.
Haba wan beh ïa ka thong, ka Mawphlang ka la kamai tang 81 run hadien ba ka la shah pynhap 10 wiket ha ki 16.4 over. U Banbhalang Nongsiej u la tied 16 run na ki 11 bol. Katba u Moonlight War (Player of the Match) bad u Kyrmenskhem Nongpluh ki la khur mar 3 wiket.
Haba phai sha kawei pat ka jingïakhun kaba ar, ka Pomshutia CC ka la jop da 6 wiket ïa ka Laitjem CC. Ka Laitjem ka la shimti ban tied nyngkong ha kaba ka la kamai 64 run bad shah pynhap 10 wiket ha ki 16.4 over. U Manchester Pathaw u la tied 13 run na ki 13 bol. Katba u Shembhalang Pyngrope bad u Skhembor Khong-btep ki la khur mar 3 wiket.
Haba wan shimti ïa ka pali kaba ar, ka Pomshutia ka la kynjoh sha ka thong da kaba kamai 67 run bad shah pynhap 4 wiket ha ki 15.1 over. U Shembhalang Pyngrope u la tied 31 run na ki 44 bol bad ban khur ïa ka nam Player of the Match. Katba u Antony Pathaw u la khur 2 wiket.
