Guwahati, Lber:
Ka tarik ba la buh na ka bynta ka jingñiew vote na ka bynta baroh ar ki jylla kata jong ka Arunachal Pradesh bad ka Sikkim ïa kaba la dep ban pynbna hashwa ba kan long ha ka 4 tarik, Jylliew kan sa long noh ha ka 2 tarik, Jylliew, la ong ka Election Commission of India (ECI) ha ka jingthoh ba la phah.
Katkum ka jingthoh la ong, “Ka ECI kan sa pynlong ïa ka ilekshon sha Legislative Assemblies jong ka Arunachal Pradesh bad jong ka Sikkim hashwa ban kut ka samoi treikam jong ki, ha ka jingpyntreikam kaba hap hapoh ka Article 324 hapoh ka jingïaid ryngkat bad ka Article 172(1) jong ka Riti synshar jong ka ri bad hapoh ka Section 15 jong ka Representation of the People Act, 1951. Ka samoi treikam jong ka ïingdorbar jong kine baroh ar, kata jong ka Legislative Assemblies jong ka Arunachal Pradesh bad ka Sikkim kan sa kut ha ka 2 tarik, Jylliew, 2024.”
Ka jingthep vote kan sa long ha ka 19 tarik, Ïaïong ha kine baroh ar tylli ki jylla.
Ka Election Commission ka la dep ban pynbna ïa ka jingpynbna kaba ong ba ka jingthoh ba la phah ha kaba ïadei bad ki jingpyntip ba bniah ha kaba ïadei bad ka ilekshon yn sa pyllait ha ka 20 tarik, Lber, 2024 kata mynta ka sngi. Ki kyrtong kin sa pynrung kyrteng ha ka 27 tarik, Lber, ha kaba ka jingkhmih bniah ïa ki kot pynrung kyrteng kan sa long ha ka 28 tarik, Lber.
Ka tarik kaba khatduh na ka bynta ban weng ïa ka jinglong kyrtong la buh ba kan long ha ka 30 tarik, Lber.
