Melbourne, Lber:
Ha kane ka jingjia kaba sngewsih, la ong ba uwei u briew u la duh ei noh la ka jingim hadien ba hap nalor jong ka ‘Hot Air Balloon’ kaba u dang shong tang kumba 30 minit naduh ka por ba dang pynkiew ia ka shalor suiñ. La ong ba katei ka balloon ka la sangeh bad hiar ha ka rukom kaba dei. Hadien kata ia ka met jong utei u briew pat la shem na ki thaiñ ba marjan na ka jaka ba katei ka balloon ka leit hap.
Kiwei pat kiba ïadon lang hapoh jong katei ka balloon lane kaba ngi ju tip kum ka parachute ki kynthup ia u nongpynher jong katei ka balloon, uba la khynñiuh bad um nang shuh ban kren ne batai eiei halor katei ka jingjia namar ka jingshyrkhei jong ka jinghap utei u briew nalor suiñ ha ka por ba u dang shong lang bad u ha katei ka kynja balloon kaba ki briew ki shait shong ban peitkai ia ki jaka nalor suiñ.
Haba ai jingkren sha ki lad pathai khubor ha katei ka sngi, ki pulit ki suba ba katei ka jinghap jong utei u briew ka lah ban long namar ka jingiakynad bad utei u nongpynher ia katei ka kynja balloon ba kit briew. La ong ba katei ka balloon ka dei kaba mih na ka thaiñ Shatei jong ka Melbourne ha ka por mynstep, kaba long ka nongbah kaba wan ba ar ha ka jingheh na kiwei pat ki nongbah hapoh ka ri Australia.
Ki nongmihkhmat jong ka National Commercial Hot Air Ballooning Industry bad ka Australian Ballooning Federation ki la phah ia ka khubor sngewlem sha ki bahaiing-bahasem jong utei u briew uba la duh noh ia ka jingim ha katei ka jingjia ba sngewsih.
Ha ka jingthoh ba la pyllait paidbah, kitei ki tnat ki la ong ba ha ka jingshisha, ia kitei ki synduk ‘basket’ lane ka jakashong ba la pynsnoh ha katei ka balloon ba ki briew kin shong, la ju shna bad pynskhem bha khnang ba kiba shong hapoh kin ym hap bakla ha ka por ba ki la shong ne kiew hapoh jong katei ka synduk.
Kumjuh ruh ka tnat pulit na Victoria ka la pyntip ba ki pulit kin dang wad bniah bad tohkit bniah ruh ia utei u nongpynher ia katei ka balloon ha katei ka sngi bad yn sa ioh ruh ban ai ia ka jingpynshai hakhmat ka iing bishar ynda la dep ban tohkit bniah bah baroh.
