New Delhi, Lber 19
Ka Supreme Court ha ka Sngi Ba-Ar ka la kyntait ban pynsangeh ïa ka jingpyntreikam ïa ka Citizenship Amendment Act (CAA), bad ka la ai por ïa ka Sorkar Pdeng haduh ka 8 tarik Ïaïong ba kan jubab halor ki 237 tylli ki mukotduma kiba ïeng pyrshah ïa ka CAA.
Ha kajuh ka por, ki nongmudui pyrshah CAA ki la ïoh lad ban wan mih sha ka Supreme Court lada ka Sorkar Pdeng ka ai syrnod nongshong shnong ïa kino-kino hapoh ka CAA hashwa jong ka 8 tarik Ïaïong.
“Ngin hap ban ai da ka jingthoh kaba bniah halor ki 237 tylli ki mukotduma…ha ka jingshisha ngi donkam saw taïew ban pyndep ïa ka jingai jubab,” la ong u Solicitor General ka Ri ha Supreme Court.
Ïa ki mukotduma pyrshah CAA la bishar da u Chief Justice DY Chandrachud, Justice JB Pardiwala, bad u Justice Manoj Misra. Ki nongmudui ki kynthup ïa ka Indian Union Muslim League, kaba dei ka seng saiñpyrthei na Kerala, bad ki nongïalam na ka liang pyrshah, u Jairam Ramesh na ka Congress bad ka Mahua Moitra na ka Trinamool Congress.
Na ka liang ka Supreme Court ka la pynbna ba kan shong bishar biang halor katei ka mat ha ka 9 tarik Ïaïong.
Ki nongmudui ki la dawa ba dei ban pynsangeh shwa halor ka jingpyntreikam ïa ka CAA da kaba pynpaw ba ka CAA ka long pyrshah ïa ki Muslim.
Ka sorkar u Narendra Modi ha ka 11 tarik Lber, 2024 ka la pynpura ïa ka jingpyntreikam ïa ka CAA da kaba wanrah ïa ka Citizenship (Amendment) Rules, 2024.
Lah ban kdew ba ka CAA, kaba pynlong, ha ka sien banyngkong eh, ïa ka niam lane ka jingngeit kum ka nongrim ban pynlong nongshong shnong ka Ri India, ka la wanrah ïa ka jingïakynad kaba jur ha ka Ri bad kumjuh ruh ha Meghalaya. Ïa ka CAA la ai jingmynjur da ka Parliament ha u Nohprah 2019, hynrei dei tad haduh mynta ka sngi ba la pynbna ïa ki ‘Rule’ jong kane ka aiñ (CAA).
Ka CAA ka thmu ban ai syrnod nongshong shnong bapura jong kane ka Ri ïa ki briew kiba dei na ka niam Hindu, Khristan, Sikh, Jain, Buddhist bad ki Parsi kiba la shah ban beiñ ha Bangladesh, Pakistan bad Afghanistan namar ka jingngeit/niam ka jong ki, bad kiba la rung sha India hashwa ka 31 tarik Nohprah, 2014.
