New Delhi, Lber:
Katkum ki khubor la iathuh ba 8 ngut ki ‘riew paidbah jong ka Afghanistan ki la duh noh ia ka jingim na ka jingleit ther bom ki shipai Pakistan ha ka Lah Sngi U Blei sha ki bynta khappud jong ka Pakistan bad Afghanistan. Kane ka jingleh ka la pynlong ia ka Afghanistan ba kan pynphai kylliang bad ban kput ia ka Pakistan kumba ka la leh ia ka ha katei ka sngi.
Namar la ong ruh ba ka jingiakynad khappud hapdeng kitei ar tylli ri ka la neh slem bha naduh ba ka Taliban ka la ioh knieh ia ka bor synshar hapoh Afghanistan ha u snem 2021, ha kaba ka Pakistan pat ka ju kynnoh ba ki lehnoh na Afghanistan ki ju thombor man ka por sha ki bynta khappud jong ka Pakistan.
U nongrah ktien jong ka Taliban, u Zabihullah Mujahid u la iathuh ba kawei ka liengsuiñ jong ki shipai Pakistan ka la leit ban ther bom sha ki thaiñ ba don ki iing paidbah ha ka thaiñ Khost bad Paktika kiba don mar khap bad ka Pakistan.
Kumta, ka tnat iada jong ka Afghanistan ha katei hi ka sngi ka la pyntip ba na ka liang ka Afghanistan ruh ka la ther bom bad kput kylliang sha kitei ki bynta khappud jong ka Pakistan.
Haba iadei bad kane, ka sorkar Taliban ha katei ka Sngi Nyngkong ka la pynrem jur halor katei ka kam thombor jong ka Pakistan bad ka la ong ruh ba kane ka long ka jingleh pynkheiñ aiñ jong ka Pakistan bad ka jing bym burom shuh ia ki para marjan ri.
Kumjuh ruh na ka liang ka tnat kam bar ri jong ka Pakistan, ha ka janmiet Sngi Nyngkong ka la pynbna ba ka tnat iada jong ka ri ka la leit ban thombor ia ki ktem lehnoh Afghanistan kiba don ha khappud jong ka Pakistan bad Afghanistan.
Ha katei ka jingpynbna, ka Pakistan ka la pyntip ba ki shipai ka Pakistan ki thmu bad leit thombor pyrshah ia ka kynhun lehnoh Hafiz Gul Bahadur, kaba long kawei na ki kynhun lehnoh jong ka Taliban na Pakistan, bad ka tehreek-e-Taliban Pakistan (TTP) kiba don bynta ha ki jingleit thombor ia ki pulit bad ki heh ka tnat iada jong ka Pakistan ha kine ki khyndiat por ba la leit.
