Itanagar, Lber:
Ym slem hadien ba la dep ban pynbna ïa ka tarik ban pynlong ïa ka ilekshon Lok Sabha bad ka ilekshon Assembly ha Arunachal Pradesh, ki pulit ha Lower Subansiri distrik, ha ka jingpynkhlaiñ ïa ka jingpyntreikam, ki la ïoh ba kurup ïa ka pisa kaba palat ` 59 lak na kawei ka kali kaba don ha Ziro, ka District Headquarters, ha ka janmiet jong ka sngi Saitjaiñ, la ïathuh ki pulit.
Ka kynhun jong ki pulit ka la ïoh ban kurup ïa ka pisa kaba la kot sha ka ` 59.02 lak na ka kali kaba don hajan ka thaiñ Pine Grove ha Itanagar ha ka por 4 baje janmiet, la ïathuh u Superintendent of Police (SP) jong ka Lower Subansiri u Keni Bagra.
U la ong ba ïa ka pisa la ïoh ban kurup na uwei u briew ba la tip kyrteng kum u Boa Terry, uba dei u nongshong shnong jong ka Boasimla na ka distrik ba marjan na Kamle distrik.
Kumba la ïathuh, la ong ba kane ka kali ka la thmu ban leit na Ziro sha Kamle distrik. Ka jingtohkit ha kaba ïadei bad kane ka jingjia ka dang don hapdeng ka jingtohkit jong ka IT Department, naba la ïoh ban kurup ïa ka hadien ba la pyntreikam ïa ka Model Code of Conduct, la ong u SP. Ïa baroh ki jingpyntreikam la leh naduh ba la ïoh ba kurup ïa kane ka pisa hakhmat ka jingdonlang jong u Executive Magistrate, la bynrap shuh shuh u SP. Kane ka jylla kan sa pynlong ïa ka ilkeshon ha ka bynta kaba nyngkong ha ka 19 tarik, Ïaïong.
