Tel Aviv, Lber:
Ki shipai ka Israel ha ka Lah Sngi U Blei ki la leit thombor ia ka hospital kaba heh duh hapoh ka nongbah Gaza bad pyntip ruh ba la ioh ban siat bad shim ia ka jingim jong 20 ngut eiei ki lehnoh Hamas kiba don ha katei ka jaka sumar. Ia katei ka hospital kaba heh duh hapoh Gaza la ju tip kum ka Al-Shifa Hospital.
La ong ba ki shipai Israel ha katei ka sngi ki la leit tur da ki tup- ki man bad ki liengsuiñ thma bad ki la leit ban ker tawiar ia katei ka hospital ha katei ka sngi.
Ha katei ka jingleit khynra, ki shipai Israel ki la pyntip ba la ioh bat ruh sa kumba 200 ngut eiei kiba la suba ba kin dei beit ki dkhot jong katei hi ka kynhun lehnoh Hamas hynrei kiba dang pynkhreh ialade na katei ka jaka sumar ban leh mynleh kum ki nongtrei bad ki dkhot jong katei ka hospital.
Kumta, ha katei ka sngi la ong ba ki shipai Israel ki la ioh ban siat iap ia 20 ngut ki lehnoh Hamas kiba don hapoh ki kylleng sawdong jong katei ka hospital bad sa 20 ngut pat kiba don sha ki thaiñ ba marjan jong katei ka hospital.
