Ngim kyrshan ïa ka BJP ne NPP; 3 ngut ki kyrtong kiba pan jingkyrshan: KHNAM

Shillong, Lber 19

Ka Khun Hynñiewtrep National Awakening Movement (KHNAM) ka la kren shai ba kan ym kyrshan ïa ka Bharatiya Janata Party (BJP) ne ïa ka National People’s Party (NPP) ha kane ka ilekshon ban wan sha ka Lok Sabha.

“Ngin ym kyrshan ïa ka BJP ne ka NPP. Ngi la ïoh pdiang shithi na 3 ngut ki kyrtong kiba la pan jingkyrshan na ngi,” la ong u Working President ka KHNAM, Bah Thomas Passah.

U la ong ruh ba ka seng kan sa shong ïa ka jingïalang CEC mynta u taïew ban shim rai halor katei ka bynta.

Haba kylli, u la ong ba haba phai sha ka jingkyrshan, kaba kongsan eh ka long haba ïadei bad ki mat jong ka jaidbynriew bad uno-uno u kyrtong uba ka seng ka kyrshan u dei ban don ka jingkut jingmut kaba skhem ba un trei minot na bynta u paidbah ka Jylla.

“Ngi kwah ba ka ILP kan urlong noh, kumjuh ka jingpynrung ïa ka ktien Khasi ha ka Khyrnit kaba 8. Haba phai sha ka jingpynbeit pud, ngi la mad ïa ka jingduhnong kaba khraw ha ka kylla banyngkong. Ha ka kylla ba-ar, khlem shym la kynjoh lang ïa ki nongshong shnong ha ki khappud (khamtam ha Block I bad II), kumta ngi ima ha kane ka kylla ba-ar,” u la ong.

U Bah Passah u la ong ruh ba u kyrtong uba ka seng kan kyrshan u dei ruh ban pynsngew ïa ka mat ban phiah noh la ka jong ïa ka All India Service hapdeng ka Meghalaya bad Assam.

“La 52 tylli ki snem la ïaid, ngi la dei ban ïoh noh la ka jong khnang ban lait na ka jingtuklar jong ka Assam,” u la ong.

U la pynsngew ruh ba u kyrtong (uba ka seng kan kyrshan) u dei ban rah ïa ka mat, kata ban wanrah jingkylla ha ka hukum u President jong u snem 1950 da kaba thoh pynbeit ïa ka kyrteng Khasi bad ban kynthup lang ïa ki ‘Sub-Tribe’ jong ka – Khynriam, Pnar, Bhoi, War, Maram, Lyngngam.

“Ngin kyrshan ïa u kyrtong halor ki nongrim,” u la ong.

Na ka liang u Working President u la ong ruh ba kum ka seng, ka thrang ba ka BJP kan ym wan shuh ha kane ka kynti namar ka jingdon jong ka ha ka Sorkar Pdeng ka buh jingma ïa ka bynta ba ïadei bad ka niam kumjuh ïa ka jinglong kyrpang jong ki rit paid.

“Ha kine ki 10 snem ka jingsynshar ka BJP, ngi ïohi ïa ka jingma, mynta ka CAA, bad lada ka BJP kan dang bteng, kan ïalam sa shah ka NRC bad NPR,” la ong u Bah Passah.

Shuh shuh haba jubab, u la ong ba ka NPP hapoh Parliament ka kyrshan ïa ka CAA bad naduh ba la synshar ma ka (NPP) hapoh ka Jylla, ka jingsynshar kam long kaba ïajan bad ki paidbah bad ka la bun sa tang ka jingpynlut ïa ka pisa paidbah da kaba thung ïa ki ‘riew saiñ-pyrthei ha ki kam bapher-bapher.

Kum ban shu kdew hangne, ka KHNAM ka la rai ba kan ym ïakhun ne pynïeng kyrtong ha kane ka ilekshon ban wan sha ka Lok Sabha.