Shillong, Lber 19
Ka Jylla ka la khur ïa san tylli ki takma na ka jingïalehkai athletics bad Pencak Silat ha ka lympung ïalehkai 3rd North East Games kaba la long ha ka Sngi Ba-ar ha Kohima, Nagaland.
Kane ka la wan hadien shi sngi ba la plie ïa kane ka lympung ïalehkai ha Kohima. Katba ka kynhun rangïalehkai phutbol ka la mad ïa ka jingshah rem kaba nyngkong da 2-1 kol ha ka Arunachal Pradesh.
Ïa ka takma ksiar la khur da u rangïalehkai athletics na Ri Bhoi District, u Skhemlang Suba ha ka jingïakob mareh 1500Mts ki shynrang, katba ïa ka takma rnong la khur da ka Glorify Kurbah ha ka jingïakob mareh 1500Mts jong ki kynthei.
Ka Meghalaya ka la khur ruh ïa ka takma ksiar ha ka jingïakob mareh kynhun (team event) jong ki shynrang ha ka Relay 4×400 mts, katba ka kynhun jong ki kynthei ka la khur ïa ka takma rnong.
Ki nongïalehkai shynrang kiba ïashim bynta ha ka Relay 4x400mts ki long u Kyrshanlang Shylla, Donbok Shabong, Repol Dkhar bad u Skhemlang Suba. Ha ka liang ki kynthei ki long ka Glorify Kurbah, Ritina Hanse, Rukini R.T Dkhar bad ka Inocensia Tympuiñ.
Ha ka Boxing, ka Jylla la thikna ban khur takma lyngba ar ngut ki rangïakura kata u Sanjeev Maskut hadien ba u la lah ban jam sha ka semi final jong ka kyrdan ïakura 48kg bad u Ram Lyngdoh u la khur jingjop ha ka quarter final jong ka 60kg bad u la jam sha ka semi final.
Ha ka Badminton, ka kynhun ki rangïalehkai bad ki ‘thei ïalehkai ka Jylla ki la shah rem noh ha ka Assam bad ha ka Nagaland.
Ha ka 100Mts jong ki shynrang, u Repol bad u Henry ki la jam sha ka final, katba ka C. Kasanchi bad ka Riyoka ki la jam sha ka final ha ka 100mtr ki kynthei. Ha ka Pencak Silak, u Yuvraj D. Sangma u la khur ïa ka takma rnong ha ka Tungal.
Ha ka Basketball ki kynthei, ka Meghalaya ka la pynliem ïa ka Assam da 66-36 basket. Katba ha ka liang ki shynrang ka Megha-laya ka la jop ïa la Tripura da 90-53 basket. Ha ka Table Tennis ka kynhun ki ‘rang bad ki ‘thei ïalehkai ka Jylla ka la jam sha ka semi final.
Haba phai sha ka ïakop siatkhnam (Archery), la lah ban pyndep ïa ka Ranking Qualification Round ha ka jingïakob siat jong ka Recurve bad Compound jong ki kynthei bad shynrang. Kumta kane ka jingïakhun kan bteng biang ha ka Sngi Balang.
