Bengaluru, Lber:
U Symbud Myntri jong ka Karnataka u DK Shivakumar u la ong ba u Myntri Rangbahduh u Narendra Modi u la don ka jingsheptieng ïa u President jong ka seng Congress u Mallikarjun Kharge naba u la sdang ban pynlong ïa ka jingïalap na ka bynta ka ilekshon Lok Sabha 2024 na ka distrik jong u Kharge ka Kalaburagi, la ïathuh ka tyllong khubor.
U la ong ba ka seng ka la kyrmen ba kan sa jop ha ki 20 tylli ki Lok Sabha konstitwensi ha Karnataka kynthup ha Kalaburagi.
“U Modi u sheptieng ïa u nongïalam jong ka liang pyrshah u Mallikarjun Kharge. Na kane ka daw u la sdang noh kloi ïa ka jingïalap ilekshon na Karnataka, khamtam na Kalaburagi. Ka seng Congress kan sa jop ha ki 20 tylli ki konstitwensi ha Karnataka kynthup na Kalaburagi Parliamentary konstitwensi,” la ong u Shivakumar ha ka jingïakren bad ki nongthoh khubor.
Ka Kalaburagi (Gulbarga Lok Sabha konstitwensi) ka dei ka distrik ba sah u heh nongïalam jong ka seng Congress u Kharge, uba la shahjied sha Lok Sabha ha u snem 2009 bad 2014.
U la shah rem noh ha u kyrtong jong ka seng BJP u Umesh Jadhav ha ka jingïakhun ïa ka General Elections 2019.
