Shillong, Lber 19
Ka khlur ïalehkai phutbol jong ka Jylla ka samla Bonifilia Shullai ka la pynpaw ïa ka jingsngew-kmen ban ïoh ïa ka lad ban mihkhmat ïa ka ri India ha ka SAFF U-16 Women’s Championship 2024 kaba la kut dangshen ha Nepal. Kane ka dei lyngba ka jingbtin lynti u kpa lem bad ki hynmen jong ka ha kane ka jingïaid lynti ha ka kam ïalehkai phutbol.
Ïa kane ka la pynpaw ha ka jingpynkup burum da ka Dorbar Shnong Lawmali Pyllun kaba la long ha ka Sngi Ba-ar ha Community Hall jong ka Lawmali Pyllun ha kaba la ïadonlang u Rangbah Shnong Bah Bhalang Khongwir, u Assistant Rangbah Shnong Bah Anthony Lyngdoh, u Assistant General Secre-tary Bah P. Nongneng, ki Seng Samla Lawmali Pyllun, ki Seng Kynthei, ki dkhot ka Lawmali Pyllun Sport Club lem bad ki nongshong shnong ka Lawmali Pyllun.
“Nga la thrang ha kane ka kam ïalehkai phutbol naduh ba nga dang don ha ka rta kaba dang 3 snem, hynei naduh 5 snem ka rta i Pa i la ïalam ïa nga sha madan Pasteur ban pynkilanmet lang bad ki khynnah shynrang,” la pynpaw kane ka khlur ïalehkai ka Jylla ha katei ka jingïalang.
“Dei hadien ba la nga don ha ka rta kaba 6 snem ka rta, ka Lawmali Pyllun SC ka la pynlong ïa ka lympung ïalehkai ki khynnah ba la tip kum ka U-12 Inter House Football Tournament bad nga kwah bha ban ïashim bynta, hynrei ki la ong ba la shah tang ïa ki khynnah shynrang. Hynrei da ka jingïai kyrpad ki la shah tang ïa nga marwei ban ïalehkai phutbol lang bad ki khynnah shynrang.”
“Kumta ngam lah khlem da pynpaw ka jingsngewnguh ïa ka Lawmali Pyllun SC kaba la ju pynlong ïa ki lympung ialehkai ki khynnah na ka bynta ban btin lynti ïa ngi ki khynnah kat haduh ba nga la lah ban kynjoh sha ka thong na ka bynta ban mihkhmat ïa ka ri India ha katei ka lympung,” la bynrap.
Te kumta ka la pynpaw ka jingkhmih lynti ba kan dangïai trei shitom ha kiwei pat ki kyrdan ïalehkai khnang ba kan nangkiew shaphrang ha ka kam ïalehkai jong ka ha ki sngi ki ban wan.
U Bah P. Nongneng u la pynpaw ba u la ïohi nyngkong ïa ka sap ïalehkai jong katei ka samla ka dei ha Madan Pasteur ha kaba ka Lawmali Pyllun ka pynlong ïa ka U-12 Inter House Football. “Ngi la lah ban pynlong ïa kane ka lympung naduh u snem 1990 ha kaba la ïashim bynta tang da ki khynnah shynrang. Dei ha u snem 2018 bad 2020 ba i la shim bynta lang ban ïalehkai bad ki khynnah shynrang bad dei iwei napdeng ki khynnah kynthei ba nyngkong i ba la shim bynta lang bad ki khynnah shynrang.”
“Da ka jingrung jong i ban ïalehkai bad ki khynnah shynrang ka la pynshlur ruh ïa kiwei ki heprit kynthei ban ïalehkai bad ïashim bynta lang bad ki khynnah shynrang. Kumta naduh utei u snem ka klob ka pynrung lang ki khynnah kynthei ban ïashim bynta ha ka U-12 football. Nga lah ruh ban ong da ka jinglam khmat jong i Boni ka la pynlong sa ïa iwei na ki kynthei kata i Naphisabet Jyrwa iba ïashim bynta ha ka Inter House U-12 ha ryngkat bad i Boni,” u la bynrap.
“Ha u snem ba la dep i la shah jied ban mihkhmat ïa ka Jylla ha ka Junior Girls National Football Championship 2023-2024 kaba la long ha Jaipur bad Jhodpur kaba ha Rajasthan naduh 2 haduh 15 tarik u Risaw.
Kaba kham sngewtynnat ba katei ka ‘thei ïalehkai ka la shah jied ruh ha ki snem ba la dep ha ka Baichung Bhutia Football Academy bad ka la ïoh ïa ka lad ban mihkhmat ïa ka Gerhwal FC New Delhi bad ka la ïoh ruh ban shimti kum ka kapten ha ka Delhi Women Premier League.
Kiwei kiba la ai jingkren ha kane ka sngi ki kynthup ia u Rangbah Shnong, u Assistant Rangbah Shnong, Seng Kynthei Lawmali Pyllun bad kiwei. La pynshongshit ïa kane ka prokram da ka kynhun ki nongrwai kane ka shnong ba la tip kum ka Twins Cover.
Kane ka samla ka la long tang marwei napoh ka Jylla ban ïashim ha katei ka lympung ha kaba ka India ka la wan ha ka kyrdan ba ar hadien ka jingshah rem noh ha ka Bangladesh lyngba ka tie-breaker da 3-2 kol ha ka jingïakhun final. Ka Bonifilia ka la ïoh ruh ban thep shi kol ha ka jingïakhun pyrshah ïa ka Nepal hadien ba ka India ka la jop haduh 10-0 kol.
