Imphal, Lber:
Naba ka Election Commission ka la dep ban pynbna ïa ka tarik, ban pynlong ïa ka ilekshon Lok Sabha, u District Magistrates ha Manipur u la pynmih ïa ka hukum ba kito ki briew kiba don ïa ki License ban bat ïa ki tiar siat ba ki la dei ban leit aiti shwa ïa ki suloi jong ki sha ki jaka treikam jong ki pulit kiba hajan eh khnang ban lah ban pyntikna ban ym don kino kino ki jingjia basngewsih ha ka por ba pynlong ïa ka ilekshon. Ka Election Commission ha ka sngi Saitjaiñ ka la pynbna ba ïa ka ilekshon sha ki ar tylli ki Lok Sabha konstitwensi ha Manipur yn sa pynlong ha ka 19 tarik, Ïaïong bad ka 26 tarik, Ïaïong.
Kine ki hukum ba la pynmih da ka Office of District Magistrate Thoubal ka la ong “Ïa ki briew kiba don ïa ki License kiba dei ki nongshong shnong jong ka Thoubal distril la bthah ba ki la dei ban leit aiti shwa ïa ki tiar siat bad ki kuli ïasiat sha ki heh ba dei khmih ha ki jaka treikam jong ki pulit kiba marjan bad ki hashwa ka 23 tarik, Lber, ha kaba la ong ba lada ym leh kumba la hukum, ïa ki License yn sa pynduh noh ha ki bor pulit…na ka jingthmu ban ym buh jingeh ha ka jinglong jingman bad ban wanrah ïa ka jingïaid beit ïaid ryntih ha ka por ba pynlong ïa ka General Election kaba 18 sha Lok Sabha.
Ha kawei pat ka jingpynmih hukum da u District Magistrate ka Kangpokpi u Mahesh Chaudhari la ong ba la khang ha ka ban pyndonkam bad ban rah ïa kino kino ki tiar siat ne pynmynsaw da kito kiba ïoh ban bat License … kaba la treikam naduh ba la pynbna tad haduh ban da lah ban pyndep ïa baroh ki kam ba ïadei bad ka ilekshon.
