Mumbai, Lber:
Ki la don saw ngut lehnoh Naxal kiba la shah thong kumba T. 36 lak baroh, ki la shah pynïap ha ka jingïasiat bad ki pulit ha Gadchiroli distrik kaba don ha Maharashtra, la ïathuh u heh pulit.
Ki pulit ki la ïoh jingtip ha ka por shiteng sngi jong ka Lah Sngi UBlei ba ki la don kumba katto-katne ngut ki Naxal kiba la rung ha Gadchiroli na ka jylla bamarjan na Telangana da kaba ïaid lyngba ka wah Pranhita halor ka jingthmu jong ki ban leh ïa ki kam pyntriem hapdeng kane ka por ba la treikam ka Model Code of Conduct na ka bynta ka ilekshon Lok Sabha, la ïathuh u Superintendent of Police u Neelotpal.
Kiba bun ki kynhun jong ka C-60, kaba long ka kynhun kaba kyrpang jong ki pulit ka Gadchiroli bad ka kynhun jong ka Central Reserve Police Force’s Quick Action ki la shah phah na ka bynta ban pynlong ïa ka jingleit khynra ha kane ka thaiñ.
Katba kawei na ka kynhun C-60 Unit ka la pynlong ïa ka jingleit khynra ha ka step jong ka Sngi Ba-ar ha ki jaka lum Kolamarka kiba don hajan Repanpalli, ki lehnoh Naxal ki la siat pyrshah ïa ki khlem sangeh ha kaba kane ka la pynlong ïa ka kynhun jong ki shipai ba kin pynphai kylla ïa ka jingsiat, la ïathuh u heh pulit.
Hadien ba ka jingïasiat ka la sangeh, ki shipai ki la pynlong ïa ka jingjurip bniah ha katei ka jaka bad lap ïa saw tylli ki metïap jong ki dkhot ka kynhun Naxal u la ong, ha kaba u la bynrap shuh shuh da kaba ong ba haba la kheiñlang baroh halor ka jingthong pisa ïa kine ki lehnoh ka la long T. 36 lak.
Ïa ka suloi AK-47, ka Carbine, ar tylli ki pistol shna hi, ki kot thoh jong ka kynhun Naxal bad kiwei pat ki tiar, la ïoh ban kurup, la ïathuh shuh shuh u heh pulit.
Ïa kine ki lehnoh kiba la shah pynïap la tip kyrteng kum u Vargeesh, Magtu, kine baroh arngut ki dei ki Secretary jong ar tylli ki kynhun pyntriem hapoh ka kynhun Naxal, bad ki dkhot jong ka kynhun lehnoh ki kynthup ïa u Kursang Raju bad u Kudimetta Venkatesh, la ïathuh u heh pulit.
