Shillong, Lber 19
Ka khubor na ki pulit ba la ïohlum ha ka Sngi Ba-Ar ka ïathuh ba uwei u briew ïa uba la tip kyrteng kum u Teilang Mawlieh u la ujor ba ha ka Lah Sngi U Blei ha ka por kumba 8 baje mynmiet, ki runar ki bym lah ban ithuh bad kiba la shong ha kawei ka kali Maruti Zen, ki la pynsangeh ïa ka trok jong u (AS-24C-6024) ba la ñiah da u Poimi Ryngkhlem, bad kane ka trok ka la kit 14 tylli ki masi.
Ki pulit ki la ong ba katkum ka jingujor, katei ka trok ka la shah bat ha kitei ki runar ha ka shnong Jaïaw Pdeng ha Umroi, Ri-Bhoi, bad kita ki runar ki la rahbor ïa u nongñiah jong ka.
Shuh shuh ki pulit ki la ong ba kham hadien, kitei ki runar ki la pyllait noh ïa u nongñiah trok ha ka shnong Umroi Nongrah katba ki la tuh noh ïa kita ki 14 tylli ki masi. Nalorkata, ki la iehnoh ïa ka trok ha ka shnong Umeit.
Ha kawei pat ka jingjia, ki pulit ki la ïathuh ba ha ka miet jong ka Lah Sngi U Blei, ki runar ki bym lah ban ithuh ki la thombor ïa u Bonny Jyrwa da u ‘Screwdriver’ ha Lumkhyriem Umpling bad hadien kata, ki la phet krad. Hynrei ki pulit ki la ong ba une uba shah thombor u la mynsaw jur bad la pynkit ïa u sha NEIGRIHMS ban ïoh jingsumar.
Sa ha kawei pat ka jingjia, ki pulit ki la ïathuh ba ha janmiet jong ka Lah Sngi U Blei, ki runar ki la leit prong ha kawei ka ïing sah kaba don ha Bishop Cotton Road, Shillong bad ki la tuh ïa kawei ka TV, artylli ki tyndong lyer LPG, bad ka pisa `1,000 nalor kiwei pat ki mar.
Nalorkata, ki pulit ki la pyntip ba u Sushil Joshi u la ujor ba ha ka miet jong ka Lah Sngi U Blei, ki runar ki la tuh ïa ka thuk-thuk jong u (ML-05AA-4875) na Kench’s Trace, Shillong.
Shuh shuh ki pulit ki la ïoh jingujor na ka Kong Isheldaris Khardewsaw ha kaba la pyntip ba ha ka step jong ka 14 tarik Lber, ki runar ki la leit prong ïa ka dukan jong ka, bad ki la tuh ïa ki mar ki mata kiba shongdor kumba `29,842/-
