Nongstoiñ, Lber 19
U President ka Voice of the People Party (VPP), Bah Ardent Miller Basaïawmoit, u la pynpaw ïa ka jingsngewtikna ba u Dr. Ricky AJ Syngkon, kyrtong MP ka VPP un sa long kum u simpah u simsong ka jaidbynriew hapoh ka dorbar Parliament.
Ïa kane u Bah Ardent u la pynpaw bad kren sngewtikna haba ai jingkren ha ka jingïalang paidbah ba la pynlong da ka VPP ban pynshai ïa ki nongrim jong ka seng ha ïew Markasa ha ka sngi 19 tarik u Lber 2024.
“U Dr. Ricky AJ Syngkon un long u simpah u simsong jong ngi ka jaidbynriew hangthie ha Parliament bad ngi ngeit ba naduh ka 4 tarik u Jylliew yn ithuh ïa une u General Secretary ka VPP kum u MP jong ka Lok Sabha, u shakri ba ngin phah na kane ka Jylla,” la ong u Bah Ardent.
U la ong ruh ba ka jaidbynriew kam lah ban bakla, ki nongïalam ruh kim lah ban bakla ïa u paidbah ka donkam ka jingïa ïaid ryngkat-ryngkat. U la kyrpad ba kin ïa shim ïa ka rai rangbah, ban raikut ban ïa don bynta ha kata ka thma pyrshah ïa ka bamsap ha kata ka thma pyrshah ïa ka jingduk, ha kata ka thma pyrshah ïa ka jingleh shiliang.
“Ko ki paidbah sangeh kato ka jingsngew biej, sangeh kato ka sngew pap sangeh noh ka sngew synei, jied da ka jingstad da ka jingshemphang,” la ong u Bah Ardent da kaba u la bynrap ruh “Ki paidbah jong ka Nongkrem jong ka Mawlai jong ka North Shillong kim sngew biej lada phi ai pisa ki ong khublei shibun hynrei ka ‘vote’ ha u prah ki ong”.
Shuh shuh u la ïathuh ruh da kaba ong, “Ngi sa jop ma ngi saw ngut dei kata ka rukom pyrkhat raikut jong ki paidbah tang ba ka jingjop ma ngi saw ngut ka khlem pynshngaiñ ka khlem pynmyntoi lane ka khlem pynkmen tang ïa kita ki saw tylli ki konstitwensi hynrei ïa ka jaidbynriew baroh kawei.”
U Bah Ardent u la ong, “Ka shong ha phi ki paidbah ban rai, wat ong ba ngim lah ban leh eiei wat ong ba nga tlot, em phi dei ki nongthung; kumta ba phin thung kumta phin bet kumta ba phin ot namar kata to ngin ïa ïaid ryngkat bad ki nongïalam jong ka VPP ban wanrah ïa ka jingkylla ha ka Ri kaba ieid eh jong ngi.”
U Bah Ardent u la ong, u don ka jingngeit kaba skhem ba ka jingmih jong ka VPP kam dei ka jingjia ryngkhat. Ka VPP kam dei ka seng shimet, hynrei ka dei jong ki briew ka jong u paidbah ba la saiñ dur da ki ‘riew pyrkhat kiba kwah ban noh ïa u synñiang u bynhei ym dei ban kamai spah hynrei ban saiñ dur ïa katai ka sawphew ka sanphew snem ka ban wan. Dei namar kata ba ïohi ïa ka jingphaloh jong u prah kat shaba leit, ki khynnah ki khyllung ki bym pat tip ïa ka vote ïa ka ilekshon ki kyndeh haba ki ïohi ïa ki nongïalam.
U Bah Ardent u la ong ba u kwah ïa kito kiba don hapdeng ka jingartatien kiba don ki nongjied mynta kiba ong em, lah u prah tangba ym pat nang rai lah u prah ne ka Congress namar ba ka Congress ruh ka biang hynrei em ko paidbah ba la dei ba ka Congress kam bakla ka BJP kam ïohlad ban wan ha ka bor ha Ri India.
Namar kata, u Bah Ardent u la ong ka dawbah ka dei ka dawbah kaba plie lynti ïa ka BJP ba kan synshar donbor, dei ka jingbakla jong ka Congress bad u la ong ruh ïa kane peit ruh ha ka Jylla Meghalaya ym ithuh-ithaw ka Congress ha KHADC ka ïatreilang bad ka NPP ha ka Sorkar Jylla ka pyrshah NPP, ka VPP lada ka don marwei ruh kan ïeng ha ka nongrim kaba skhem.
