Shillong, Lber 20
U Dr. Ricky A.J. Syngkon uba mihkhmat ïa ka Voice of the People Party (VPP), un sa leit ban thep kyrteng kum u kyrtong ka seng ban ïakhun ha kane ka ilekshon ban wan sha ka Lok Sabha ha ka 26 tarik mynta u bnai.
Ïa kane la pyntikna da u nongaiktien ka seng, Dr. Batskhem Myrboh ha ka Sngi Balang.
Kum ban shu kdew hangne, ka jingthep kyrteng na bynta ka kylla banyngkong sha ka ilekshon Lok Sabha ka la sdang ha ka step Sngi Balang.
Kane ka la wan hadien ba ka Election Commission of India (ECI) ka la pynmih ïa ka jingpynbna ‘Gazette’ na bynta ki 102 tylli ki Parliamentary konstitwensi ha 21 tylli ki Jylla/UT ki ban leit sha ka ilekshon ban wan sha ka Lok Sabha, 2024.
Ka jingthep ‘vote’ na bynta ka kylla ba nyngkong ha kine ki Parliamentary konstitwensi kan long ha ka 19 tarik u Ïaïong, 2024.
Ki Jylla/UT ki ban leit sha ka ilekshon ha ka kylla banyngkong ki kynthup ïa ka Arunachal Pradesh, Assam, Bihar, Chhattisgarh, Madhya Pradesh, Maharashtra, Manipur, Meghalaya, Mizoram, Nagaland, Rajasthan, Sikkim, Tamil Nadu, Tripura, Uttar Pradesh, Uttarakhand, West Bengal, Andaman and Nicobar Islands, Jammu and Kashmir, Lakshadweep bad Puducherry.
Ka tarik bakhatduh ban thep kyrteng kan long ha ka 27 tarik u Lber, 2024 katba ka jingpeit bniah ïa ki kot ki sla kan long ha ka 28 tarik u Lber, 2024.
Shuh shuh ka tarik bakhatduh ban weng kyrteng na ka thup ki kyrtong kiba la dep thep kyrteng kan long ha ka 30 tarik u Lber, 2024.
Haba phai sha ki 2 tylli ki konstitwensi ha Meghalaya ba kynthup ïa ka Shillong bad Tura Parliamentary konstitwensi, ym pat shym la don kino-kino ki kyrtong kiba la wan thep kyrteng ha ka sngi nyngkong.
Ka tarik ñiew ‘vote’ kan long ha ka 4 tarik u Jylliew, 2024.
