Bengaluru, Lber:
Ki heh pulit ki la ïoh ban kurup ïa ki Gelatine Stick bad ki tiar pynbthei hajan ka phyllaw jong ka skul kaba don ha Bengaluru ha ka sngi Ba-ar. Ïa kine ki tiar pynbthei la lap najan ka phyllaw jong kawei ka skul jong ki riewshimet, la ïathuh ki pulit.
Ki pulit ki la lap ruh ïa kawei ka Tractor ba la pynïeng hajan kawei ka sem ba la dara shipor ba la shna na ka bynta ban sah ki nongtrei kiba trei ha katei ka jaka. Ki heh ba dei khmih halor kane ka bynta ki la ïathuh ha ki pulit la ong “ki la ïoh jingtip ba la don ka jingpynbthei bom ban pynpait ïa ki maw ha ka jaka ba la shna jingshna.”
Kumba ju leh, la ong ba ïa ki Gelatine la ju pyndonkam na ka bynta ban pynpait ïa ki maw bad kiwei pat ki tiar kiba kham heh bad khia bad heh, la ïathuh ki heh pulit.
“Ka kynhun jong ki pulit ha ka por ba ki la pynlong ïa ka jingleit pahara ha ka por mynmiet ki la khmih bniah ïa ki 7 haduh 8 tylli ki Tractor ba la pynïeng hakhmat katei ka skul. La lap ïa kawei ka pla plastik kaba don ïa ki tiar pynbthei ha kawei ka synduk jong kawei ka Tractor. Ngi la buh ka jingmudui ha kaba ïadei bad kane ka Tractor kaba la shah kurup,” la ïathuh shuh shuh ki heh pulit.
“Ngi la pynlong ïa ka jingleit thwet ïa kiwei pat kiba la shah kynnoh ha kaba mynta ki dang phet rieh na kti jong ki pulit hadien ba ka la don ka jingbthei hajan katei ka jaka. Ngi la ïoh ban kurup ïa 12 tylli ki Gelatin Stick, ki tiar pynbthei bad ki Wires kiba dei ban pyndonkam ha ka ban pynbthei. Ka jingtohkit ha kaba ïadei bad ka jingjia ka dang ïai bteng,” u la bynrap. Kane ka jingjia ka la jia ha ka jaka kaba hap hapoh ka jingkhmih jong ki pulit ka Bellandur bad ki pulit ki la buh da ka jingmudui hapoh ka jingtreikam jong ka Explosives Substances Act.
